Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
70
— Esa-chi, qiz bola shayton bo‘ladi. 
— O‘ynab qo‘yay, o‘ynab qo‘yay, qaerdan sovchi keldi-e? 
— Dehqonoboddagi urug‘laridan keldi. 
— Rais bova meni aytmadimi-e? 
— So‘ratdi, ulidan so‘ratdi. 
— Dali-g‘uli raisimiz bor-da! 
Shunday deb ichkariladim. Sandiqdan ohorli kiyimlarimni qoqib-qoqib kiyib oldim. Taxloqlik 
olado‘ppimni yoyib-yoyib kiyib oldim. 
Ana endi kechasi bilan Shoberdi eshitasan, Dehqonhul, Shoberdi eshitasan, dedim. 
Tashqarilab, soqolimni uqaladim. 
— Ay, soqolim o‘sgan yo‘qmi? — dedim. 
— Kechasiga bo‘la beradi, — dedi ayolimiz. Qornim to‘yib qolmasin deya, oz-ozdan choy ichdim. 
— Rais bovani qizi bo‘yi yetdimi-a? — dedim. — Qiz bola shayton degani chin-da-a? O‘zi, qizi 
qanday qiz bo‘ldi? 
— Picha shallaqiroq. 
— E-e-e, unday dema-e, ukkag‘arni ayoli, unday dema! Raisni qiziniyam shunday deydimi? Raisni 
qizini-ya! 
— Rais bo‘lsa bo‘pti-da. Bilganimni aytaman-da. 
— Bilsang-da aytma! Yon qo‘shning — jon qo‘shning! 
— Unda, nimaga so‘raydi? 
— Hali, gap ochilsa aytaman-da. Og‘zimga tolqon solib o‘tirmayman-da. 
— Ha-a, maqtab qo‘ya bersin-da. 
— Nima deb maqtayin, sen ayt-da? Erkak odam umri dalada o‘tadi, nimani biladi. 
— Tavba-e, ayol odamni umriyam uyda o‘tayotgan yo‘q! 
— Ishqilib, ayol ayol-da, qiz bolani yaxshi biladi. 
— Nima deb maqtardi, qizimiz uncha-muncha qizlardan emas, deydi-da. Kamgap, pazanda, chevar 
deydi-da. 
— Bizni qizimiz deyin-a? 
— Deydi-da, o‘zini qizlari bilan billa o‘ynab katta bo‘lgandan keyin, deydi-da. 
— Chin, katta bo‘libdi, bilmay qolibman, chin. 
— O‘zini qiziday gapda. 
— Chin, o‘zimni qizimday gap, chin. 
— Ishqilib, maqtaydi-da. 
— Maqtayman-da, qizimizni maqtayman-da. Y
O
,
pirim, men endi borayin, aytgan joydan qolma, 
dedilar. 
So‘ridan ko‘cha yo‘l oldim. 
Raisi darvoza oldida mayda mashina mo‘l bo‘ldi — demak, raisimiz davrani katta oldi. 
Men raisi darvozaii jonli-jonli taqillatdim. 
Darvozani raisimizni o‘g‘li ochdi. 
Men chaqiribsizlar deya, ichkari kirib keta berayin dedim — betim bo‘lmadi. 
— Rais bova bormi? — dedim. 
— Bor-bor, aytib kelayin. Raisimiz chayqala-chayqala keldi. 
— E-e, Dehqonqul aka, tinchlikmi? — dedi. 
— Tinchlik, rais bova, tinchlik, — dedim. — Hormang, rais bova? 
— Salomat, salomat... 
Shoberdi baxshi eshib-eshib do‘mbira chaldi. 
— Ha, nima gap? 
— Hech gap yo‘q, rais bova. 

---

Tog‘ay Murod. Otamdan qolgan dalalar (roman)