Microsoft Word kr ot kishnagan oqshom ziyouz com doc

www.ziyouz.com кутубхонаси 
51
Тарлон кўнгил берибди, Олмакўз кўнгил олибди! Аҳай-аҳай! 
Охир-оқибат... Олмакўз дилдорлик берибди!.. 
— Йўғ-е? — дедим. 
— Ҳа-да! — Энди қуда бўлдик, Зиёдулла чавандоз, қуда-қудағай бўлдик! 
— Ҳазиллашманг-е, жувозкаш, ҳазиллашманг-е! 
— Беҳазил, қуда, беҳазил! Ўзиям қайлиқ ўйинимисан, қайлиқ ўйини бўлди-да... О-о-о!.. Куёвни 
нима бериб боққансиз, Зиёдулла чавандоз? 
Бошимни чайқаб-чайқаб кулдим. Қўлимни силтаб-силтаб кулдим. 
— Гапингиз қурсин-е, жувозкаш-е, гапингиз қурсин-е! 
— Эбо-е, ана қайлиқ ўйини, мана қайлиқ ўйини... О-о-о!.. 
Юзларимни ушлаб-ушлаб кулдим, юзларимни беркитиб-беркитиб кулдим. 
— Бўлди-е, жувозкаш-е, бўлди-е! 
— Эбо-е... Қаранг-а! Эбо-е... қаранг-а! 
— Астароғ-е, аёл эшитади-е! 
— Эбо-е... Қаранг-а! Биз ҳам юрган эканмиз-да... О-о-о, ана мана!.. 
— Қандай-қандай?.. Бўлди-е, аёл эшитади-е! 
— Сиз билан биз ҳам... юрган эканмиз-да, Зиёдулла чавандоз! О-о-о, ана... мана...! 
— Астароқ дейман-е, аёл эшитади-е! 
— О-о-о, ҳалолинг бўл-е, куёв-е, ҳалолинг бўл-е!.. 
Хандон-хандон отиб кулдим.
— Э, тавба-е, э, тавбангдан-е! Шўхлашманг-е, жувозкаш-е, шўхлашманг-е! 
— Бешўхи, қуда, бешўхи! Ана куёв, мана куёв! О-о-о, ана... мана..! 
Қаҳ-қаҳ уриб келдим. 
— Бўлди-е... Бизнинг Тарлон шўх экан-да, а, шўх экан-да? 
— Ҳа-да! Эгасига тортганми, билмайман! Мол эгасига ўхшайди, дейди-ку... 
Кетимга чалқайиб-чалқайиб кулдим. 
— Нима-нима? — дедим. 
— Мол эгасига ўхшамаса, ҳаром бўлади... 
Девордан буғдойдай кесак олиб, Назир жувозкашга отган бўлдим. Жувозкаш билаги билан 
бетини пана қилган бўлди. 
— Астароғ-е, аёл эшитади, астароғ-е! — дедим. Кафтларимни кафтларимга қарс-қарс уриб 
кулдим. 
— Бизнинг Тарлон шўх эканми-а, шунчалик шўх эканми? Ай, Тарлон-е, ай, Тарлони тушмагур-
ей! Қўлларимни бир-бирига ишқаб-ишқаб кулдим. 
— Бизнинг Тарлон шўх-да, шўх! Бир шўхлашибди-да! Ўтадиган дунёда бир шўхлашайин, дебди-
да! — Кула бериб-кула бериб, ичларим оғриб қолди. Кула бериб-кула бериб, кўзларим ёшланиб 
қолди. 
— Мол эгасига ўхшайди, дейсиз-да? Ай, уккағарнинг қудаси-е! — дедим. — Айниқса, от эгасига 
ўхшайди, дейсиз-да? Ай, уккағарнинг қудаси-е!.. 
Гарчи қўлимга бир нима илашмаса-да, девордан кесак олиб отган бўлдим. Гарчи бир нима 
отилиб бормаса-да, жувозкаш пусиб қолган бўлди. 
— Ай, кучингдан Тарлон-ей, кучгинангдан-е!— дедим. 
Мириқиб кулдим, ҳузурланиб кулдим, маза қилиб кулдим! 
Бир амаллаб ўзимни босиб олдим. Юз-кўзларимни артдим. 
— Ҳа-е, шундай-шундай бўлади-да-е! Иссиқ жонда-е, иссиқ жон! — дедим. — Қани, 
ичкариланг, қуда, чой ичамиз? 
— Йўғ-е, қуда, йўғ-е. Эсимнинг борида жувозхонамга кетайин. Бўлмаса, куёв бўлмиш келинни 
кўриб қолади-да, тағин ҳиқиллаб ёпишади! 
— Шундайми, унда, майлингиз. Ўзи, келин қаерда, қуда? 

---

От кишнаган оқшом (қисса). Тоғай Мурод