Microsoft Word iqbol mirzo ziyouz com doc

EY, DIL... 
 
Ey, dil, ne istaysiz yalang‘och ko‘kdan, 
Anvor ummonida titraysiz dir-dir. 
Yerga bir boqingiz – qishu yoz, ko‘klam, 
Kuzlar unutdilar bizlarni bir-bir. 
 
Imkon qo‘ldan ketdi – tugadi fursat, 

---

Sizni kuylayman (she’rlar to’plami). Iqbol Mirzo 
 
 
www.ziyouz.com kutubxonasi 
49
Yaqinlar yiroqdan qaraydi dilgir. 
Ko‘zani sindirib jo‘nadi ulfat, 
Do‘stlar unutdilar bizlarni bir-bir. 
 
Xayollar qo‘ymaydi o‘z holimizga – 
Lo‘livachchalardek yopishqoq kir-chir. 
Qanotlar bog‘lovchi iqbolimizga 
Hislar unutdilar bizlarni bir-bir. 
 
Ey, dil, o‘ksimaysiz, chekmaysiz alam, 
Yerdan uzilganning jazoyi shuldir. 
Endi qaytolmaysiz Farg‘onaga ham, 
Izlar unutdilar bizlarni bir-bir. 
 
Qismat muhabbatni bizga ko‘p ko‘rgan... 
Yig‘lamang, dunyo ham bevafo, axir. 
Ming va’dalar bergan, hatto o‘ptirgan 
Qizlar unutdilar bizlarni bir-bir. 
 
1992 
 
BIRINCHI SEVGI 
 
To‘rt fasl bahor edi, 
To‘rt taraf gulzor edi. 
Sen bor eding, tilimda 
Bir qo‘shig‘im bor edi: 
 
«Gulijonning ko‘zidan 
Ohular uyaladi. 
Kiprigini ko‘tarsa, 
Osmonlar suyanadi. 
Gulijonning bo‘yiga 
Olamning guli etmas. 
Uni olib bergali 
Otamning puli yetmas...» 
 
Seni mendan ayirdi 
Ko‘zlari kir ayollar, 
Meni mendan ayirdi 
Ildizi yo‘q shamollar. 
 
Ketdi yoshlik, ketding sen, 
Dil yig‘lar, dil kuyinar. 
Dilda keksaygan quyosh 
O‘z nuriga suyanar. 
 
Menga, qalamqoshligim, 

---

Sizni kuylayman (she’rlar to’plami). Iqbol Mirzo 
 
 
www.ziyouz.com kutubxonasi 
50
Qalammi kerak edi? 
Tobutim to‘ldirgali 
Alammi kerak edi? 
 
Yurakkinam lim to‘ldi, 
Ko‘zyoshlarim sim bo‘ldi. 
Sen oylarga aylanding, 
Gulijon, men kim bo‘ldim? 
 
To‘rt fasl bahor edi, 
To‘rt taraf gulzor edi. 
Men boy edim, dilimda 
Bir qo‘shig‘im bor edi. 
 
1991 
 
ALAM 
 
Mushtimni yerga urdim, 
Tog‘lar guldirab ketdi. 
Mushtimni ko‘kka urdim, 
Ufq hilpirab ketdi: 
 
«Mening botmon mushtim-a, 
Ne qiynoqqa tushdim-a!» 
 
Mushtimni soyga urdim, 
Tosh sapchidi baliqdek. 
Mushtimni oyga urdim, 
Oy sochildi tariqdek. 
 
«Mening to‘qmoq mushtim-a 
Ne ko‘ylarga tushdim-a!» 
 
Mushtimni yo‘lga urdim, 
Kulcha bo‘lib oldi yo‘l. 
Mushtimni gulga urdim, 
G‘uncha bo‘lib oldi ul. 
 
«Mening gurzi mushtim-a 
Ne ahvolga tushdim-a!» 
 
Mushtimni qirga urdim, 
Qirlar qochdi sudralib, 
Mushtimni sherga urdim, 
Mushuk bo‘ldi, suykalib... 
 
«Mening cho‘qmor mushtim-a, 

---

Sizni kuylayman (she’rlar to’plami). Iqbol Mirzo