Microsoft Word iqbol mirzo ziyouz com doc

KO‘KLAM 
 
Salim Ashurga 
 
Ko‘klam, men ko‘nglimni ochmasdan hali 
Qat-qat hasratimni ilg‘agan ko‘klam, 
Meni deb chorboqqa tortib baxmalni, 
Qo‘ziqorin bilan mixlagan ko‘klam, 
Mening sharafimga yashin yashnatib, 
Mushakdek portlatgan momaqaymoqni, 
Xatti shikastada maktublar bitib, 
Shoxlarga bog‘lagan har bir yaproqni, 
Ko‘klam, sendek toza oshno ko‘rmadim! 
To‘qqiz oy yashadim yuragim yutib, 
Tiriklik hurmati, o‘lim hurmati 
To‘qqiz oy o‘tkazdim mavluding kutib. 
 
Ko‘klam, sabolaring ila sarmastman, 
Meni gumonlardan aylagin xalos. 
Men sendan dunyolar talab qilmasman, 
Men sendan muhabbat tilayman, xolos! 

---

Sizni kuylayman (she’rlar to’plami). Iqbol Mirzo 
 
 
www.ziyouz.com kutubxonasi 
120
Yomg‘irlar yog‘ildi, izlar yuvildi, 
Ammo ravshan tortdi dilimdagi iz. 
U qizning qalbidan mangu quvildim, 
U mening ko‘nglimdan ketmadi hargiz. 
Ko‘klam, chegara yo‘q saxovatingga, 
Sening davlatingdir tole va iqbol. 
Ismimni g‘unchadek bog‘la yodiga, 
Butkul qurimagan bo‘lsa bu nihol. 
 
Senki, chaqmoq tutgan buyuk jahongir, 
O‘lim vodiysidan yuragimgacha 
Ruhimdan tortib to Sahroi Kabir 
Inqilob ulashding va sochding chechak. 
 
Sen sabab istaklar uyg‘ondi takror, 
Ko‘zlarda aks etdi yulduz yolqini. 
Iliq kechalarda yangrar beozor 
Olis dengizlarning sokin shovqini. 
Sen bilan ketolsam edi zora men, 
Mayli, nasim bo‘lib o‘tsaydim sarson, 
Mana, bedazorni kechib boraman, 
Chigirtkalar suvday sachraydi har yon. 
 
Kelmoq-ketmoqlikning bordir muddati, 
Vaqti bilan bino bo‘lgandir ko‘k ham. 
Yuragim hurmati, sevgim hurmati, 
Meni o‘z vaqtida yo‘qlagin, ko‘klam. 
Yo‘lingga qarayman hadikka to‘lib, 
To‘qqiz oy qiynaydi shirin visoling, 
Yashayman dilbandi o‘lik tug‘ilib, 
Yangi farzand kutgan ota misoli. 
 
1995 
 
HORG‘IN ROHAT 
 
Horg‘in rohat ichra yotibman tinglab, 
(Ne baxt bu – hozircha tuproq tagimda). 
Mendan quvvat olib, sog‘lom gurkirab – 
Beshiklar o‘smoqda tevaragimda. 
 
Kapalakdek uchar rangin xayollar, 
Asal bo‘layotir gullar g‘ubori. 
Tepamda aridek turmang, savollar, 
(Ne baxt bu – yotmoqlik yerdan yuqori). 
 
Mayli, men aldamchi o‘ylar bilan mast 
Ruhimga taskinlar izlayotirman, 

---

Sizni kuylayman (she’rlar to’plami). Iqbol Mirzo