Microsoft Word iqbol mirzo ziyouz com doc

NIGOH HAQIDA HIKOYA 
 
O‘lan – mayin, o‘t – mayin, 
Yo‘lingga yotib oldim. 
Kapalak  tutgandayin 
Nigohing tutib oldim. 
 
Duv qizardi yonog‘ing, 
Shuv sirg‘ondi yuragim. 

---

Sizni kuylayman (she’rlar to’plami). Iqbol Mirzo 
 
 
www.ziyouz.com kutubxonasi 
115
Qochdim g‘olib bayrog‘i – 
Hilpiradi ko‘ylagim. 
 
Tomda yotdim shu kecha, 
Yulduzchalar jilmaydi. 
Men bilaman, tonggacha 
Sening uyqung kelmaydi. 
 
Nigohingni so‘raysan 
Odam qo‘yib o‘rtaga. 
Erkalayman, yayrayman: 
«Ertaga ke, ertaga!» 
 
Etti iqlimni aylan, 
Bunday shirin nigoh yo‘q. 
Qaytarib beradigan 
Anoyi yo‘q, ahmoq yo‘q. 
 
G‘ubor bosgan osmonni 
Engim bilan artaman. 
«Nima bo‘lar ertaga? 
Nima bo‘lar ertaga?» 
 
Uzoqni ko‘radigan 
Otangda ham gunoh yo‘q: 
«Unga qiz beradigan 
Anoyi yo‘q, ahmoq yo‘q!» 
 
O‘lan – mayin, o‘t – mayin, 
Indamaydi toptasang. 
Birovga indamayin 
Ochiladi darbozang. 
 
Yaxshi qizsan, sen hecham 
Tik qarashni bilmaysan. 
Men bilaman, tonggacha 
Bildirmasdan yig‘laysan. 
 
Nigohimni so‘nggi dam 
Kipriging kesib o‘tdi. 
Yo‘lingga yotib olsam, 
Ko‘nglimni ezib o‘tding. 
 
Senga oson har qalay, 
Buzsa bo‘lar nikohni. 
Menga qiyin, men qanday – 
Bekor qilay nigohni?! 
 
1995 

---

Sizni kuylayman (she’rlar to’plami). Iqbol Mirzo 
 
 
www.ziyouz.com kutubxonasi 
116