Microsoft Word iqbol mirzo ziyouz com doc

IZIMDAN SUDRALIB 
 
Izimdan sudralib kelaverar yo‘l, 
Ro‘paramda o‘zin yerga tashlar xor. 
Hamma mendan seni so‘raydi nuqul, 
Hamma narsa seni kutar intizor. 
 
Manglayi tirishar zinapoyaning, 
Panjara kuylaydi misoli chiltor. 
Terlab ketganini ko‘rsang oynaning... 
Hamma narsa seni kutar intizor. 
 
Meni yolg‘iz ko‘rib, ingraydi eshik, 
Seskanib tushadi suvrat va devor. 
Muzxona silkinib yig‘laydi – eshit, 
Hamma narsa seni kutar intizor. 
 
O‘ziga tig‘ urib qo‘ymasa soat, 
Chiroq esa – tamom, qimir etmas dor. 
Xontaxta sen uchun qilmoqda toat, 
Hamma narsa seni kutar intizor. 
 
Yolg‘iz men beparvo, sen menga – hech kim, 
Menda na iztirob, na dard, na ozor. 
Faqat boshqalarga keladi rahmim, 
Hamma narsa seni kutar intizor. 
 
1997 
 

---

Sizni kuylayman (she’rlar to’plami). Iqbol Mirzo