Меҳнат таълими ўқитиш методикаси фанидан

Дарсда ёритилиши лозим бўлган асосий тушунча ва атамалар - ўқув дастурига мувофиқ таълим мазмунидан келиб чиқиб аниқланади.


Дарс мақсади 3 хил бўлади:


а) таълимий мақсад – дарс жараёнида ўқувчиларда шакллантириладиган билим, кўникма ва малакаларни белгилайди;


б) тарбиявий мақсад – дарс жараёнида ўқувчиларда қайси шахсий фазилатлар, ахлоқий сифатлар ва маънавий дунёқарашни шакллантирилиши учун шароит яратилишини лозимлигини белгилайди;


д) ривожлантирувчи мақсад – дарс натижасида ўқувчиларда қайси қобилиятлар ва махсус малакаларнинг ривожлантирилиши учун шароит яратилишини белгилайди.
Шакллантириладиган компетенциялар – (фаннинг ўқув дастури асосида ва мавзулар мазмунидан келиб чиққанҳолда белгилаб олинади).


Дарс тури: янги тушунча, билимларни шакллантирувчи; ўқувчиларнинг билим, кўникма ва малакаларини ривожлантирувчи; умумлаштирувчи; ўқувчилар эгаллаган билим, кўникма ва малакаларни таҳлил, назорат қилувчи каби дарс турлари бўлиши мумкин.


Дарсда фойдаланиладиган методлар: бунда анъанавий, замонавий, интерфаол методлардан ўтилаётган мавзунинг ўқувчилар томонидан самарали ўзлаштирилишига хизмат қиладиганини оқилона танлаш лозим.


Дарсда фойдаланиладиган жиҳозлар: техник воситалар, слайдлар, кўргазмали ва дидактик материаллар. Дарс учун зарур жиҳозлар ва маълумот манбалари – дарс учун зарур бўлган дарслик ва бошқа ўқув адабиётлари, кўргазмали қуроллар, тажриба учун мўлжалланган асбоб-ускуналар, моделлар, плакатлар, тарқатма материаллар, далил ашёлар, қоғоз, ёзув-чизув қуроллари, компьютер, аудио ва видео аппаратуралари ва ўқитишнинг бошқа техник воситалари рўйхатидан иборат бўлади. Бу рўйхатни тузаётганда мактабнинг имкониятларидан келиб чиқиш тўғри бўлади. Шунингдек, бу бўлимда дарсгача қилиш керак бўлган ишлар, синфни дарсга тайёрлаш, стол ва стулларни ёки парталарни дарсга мос қилиб жойлаштириш тавсифлананиши ва тайёрлаш керак бўлган материаллар рўйхати келтирилиши, бу материалларнинг андозалари тавсифланиши ёки илова қилиниши лозим.