Medienwissenshaft

KIRISH
Ommaviy kommunikatsiya hozirgi zamon lisoniy jarayonlarning markazidan o’rin olgan yangicha borlikdir. U milliy tilning hozirgi modeli hisoblanib, unda adabiy va noadabiy sohalar doimiy o’zaro fikr almashinadi. Bunda sharoitda ommaviy kommunikatsiya turli til vositalarining o’zaro ta’sirlashishiga yordam beruvchi o’ziga xos maydonga aylanadi, deb ham bemalol aytish mumkin. Ommaviy kommunikatsiya tabiatan singuvchan va singdiruvchan bo’lgani uchun ijtimoiy ahamiyatga ega mavzu va syujetlarni hamda ijtimoiy baholashni o’z ichiga oladi.
O’zbekiston Prezidenti Sh. M. Mirziyoyev “… xalq bilan muloqot, odamlarning orzu-intilishlari, dard-u tashvishlari bilan yashash davlat siyosati darajasiga ko’tarilayotgan bugungi kunda har bir ommaviy axborot vositasi chinakam muloqot maydonchasiga, erkin fikr minbariga aylangan taqdirdagina biz o’z oldimizga qo’ygan maqsadlarga erisha olamiz”, - deya ta’kidlagan¹
Hozirgi paytda OAVni o’rganishda kompleks yondashuv rivojlanmoqda. Bunday o’quv-ilmiy yo’nalish nemis tilida Medienwissenshaft, ingliz ilmiy an’analariga ko’ra esa, medialingustic – medialingvistika deb nomlanadi. Tilshunoslikdagi ushbu yangi yo’nalish ostida mediamatnlarni o’rganuvchi turli sohalar birlashtirildi. Ularning barchasi lisoniy va mediaviy xususiyatlarning dialektik yaxlitligini ifodalaydi va medianutqning uch ko’rinishida namoyon bo’ladi: so’zlardan iborat matn, videoqator yoki grafik tasvir miqyosi, ovoz hamohangligi miqyosi.
Medialingvistika bu – media sohasidagi zamonaviy bosma, audiovizual va Internet tilini o’rganadigan yo’nalishdir.

1^ Mirziyoyev Sh. O’zbekiston matbuot va ommaviy axborot vositalari xodimlarini kasb bayrami munosabati bilan yo’llagan tabrigidan.https://daryo.uz/k/2017/06/27/