Mavzu: maydalash jarayonining nazariy asoslari reja: Maydalash jarayonlari haqida umumiy ma`lumotlar

Konusli maydalagichlarning ishlatilishi
Yirik maydalovchi konusli maydalagichga (B > 900 mm) ruda vagon (avtosamosval) orqali beriladigan holatda maydalagich tiqilish (zaval) ostida ishlashi mumkin, bu esa maydalanuvchi mahsulotni ag’dariluvchi vagondan bevosita yuklanishini ta`minlaydi (31-rasm, a.). Kichikroq o`lchamdagi maydalagichlar tiqilish ostida ishlay olmaydi, shu sababli ularda dastlabki mahsulot uchun qabul qiluvchi moslama o`rnatish ko`zda tutiladi. Bunday holda, qabul qiluvchi qurilmadan mahsulot maydalagichga plastinkali ta`minlagich orqali yuboriladi.
Maydalangan mahsulot lentali konveyerga tushiriladi va keyingi maydalash bosqichiga yuboriladi. Odatda, mahsulot o`rta maydalashga lentali konveyer yordamida yetkazib beriladi, maydalagichdan avval esa maydalash jarayoniga tushishi kerak bo`lmagan mayin mahsulotni elash uchun g’alvir o`rnatiladi. G’alvirdan elak usti mahsuloti maydalagichga tushadi, elak osti mahsuloti esa maydalagichga tushmasdan maydalangan mahsulot konveyeriga yuboriladi (31-rasm, b.).
Yirik maydalovchi konusli maydalagichlarda maydalanish darajasi 6 ga teng bo`lganda maydalashga sarflanadigan energiya bir tonna maydalangan mahsulot uchun 0,1 dan 0,8 kVt soatni tashkil qiladi.
Muntazam ravishda ishqalanib yemirilish natijasida almashtiriladigan yoki ta`mirlanadigan qismlari: qo`zg’aluvchi konusning yoki traversaning tashqi qo`zg’almas qoplamasi, maydalovchi konusni osib qo`yilgan val bilan aloqadagi yuzasi va ekssentrik stakanning yuzasi; ekssentrik stakanning tirgakli halqasi va yurituvchi valning vtulkasi hamda konussimon tishli g’ildirak. Tashqi qo`zg’almas qoplamalarning ishga yaroqlilik muddati 6 oydan 2 yilgacha (odatda taxminan 1 yil).Konusli maydalagichlarda maydalash vaqtida po`latning sarfi qoplamalarning ishqalanish natijasida emirilishiga bog’liq. Marganetsli po`lat qoplamalaridan foydalanilganda uning sarfi 0,005 dan 0,03 kg/tonnagacha yetadi.
Konusli maydalagichlari maydalash maydonida maydalanuvchi mahsulot bo`lganda ishga tushiriladi. Ishga tushirishdan oldin moy rezervuaridagi moy miqdori tekshiriladi.
Avval moylash tizimi nasosi va moyni sovutish tizimi ishga tushiriladi.
O`rta va mayin maydalovchi maydalagichlarga ruda bilan birga metall bo`yumlar tushib qolishi oqibatida maydalagich sinishi va ishdan chiqishi mumkin. Maydalagichga rudani yetkazib beriladigan konveyer bo`ylab ikkita metall aniqlovchi qurilma o`rnatiladi va ularning o`rtasiga osilib turuvchi kuchli maydonga ega bo`lgan elektromagnit o`rnatiladi.