Мавзу: чорвачилик маҳсулотлари ишлаб чиқариш таҳлили

1. Чорвачилик маҳсулотлари ишлаб чиқариш таҳлилининг мақсади, вазифалари ва ахборот манбалари.
2. Чорвачилик маҳсулотларини ишлаб чиқариш режасининг бажарилиши ва динамикасининг таҳлили.
3. Чорвачилик маҳсулотлари ишлаб чиқариш таннархининг таҳлили.
МАВЗУ: ЧОРВАЧИЛИК МАҲСУЛОТЛАРИ ИШЛАБ ЧИҚАРИШ ТАҲЛИЛИ
Чорвачилик ўсимликчилик билан бир қаторда қишлоқ хўжалигининг муҳим тармоғи бўлиб, унинг таркибига сут ва гўшт йўналишидаги қорамолчилик, қўйчилик, чўчқачилик, йилқичилик, паррандачилик, асаларичилик, қуёнчилик, ипакчилик, балиқчилик ва бошқалар киради.
Ўз навбатида бу тармоқларнинг ҳар бири маҳсулотнинг айрим турларини етиштиришга ихтисослашган ҳолда муайян ишлаб чиқаришларни, масалан: қорамолчилик – сут чорвачилигини ҳамда мол гўшти, паррандачилик – тухум ҳамда парҳез гўшт этиштиришни ўз ичига олади.
Чорвачилик маҳсулотлари ишлаб чиқариш ҳолати таҳлилининг мақсади:
Чорвачилик маҳсулотлари ишлаб чиқаришни кўпайтириш ва уларнинг самарадорлигини ошириш – аҳолини озиқ-овқат маҳсулотларига (сут, гўшт, туҳум ва ҳоказо) ва саноатнинг хом-ашёга бўлган эҳтиёжларини қондиришда чорвачилик маҳсулотлари ишлаб чиқаришни кўпайтириш имкониятларини излаб топиш ва уларни ишлаб чиқариш фаолиятига жалб қилиш чораларини кўриш таҳлилнинг асосий мақсади ҳисобланади.
Таҳлил ўз мақсадига қуйидаги вазифаларни бажариш орқали эришади:

• чорвачилик маҳсулотлари ишлаб чиқариш режасининг бажарилиши ва унинг ўзгаришига баҳо бериш;
• чорвачилик маҳсулотлари ишлаб чиқариш динамикасини таҳлил қилиш;
• чорвачилик маҳсулотлари ишлаб чиқариш ҳажмининг ўзгаришига таъсир кўрсатувчи омилларни ҳисоб-китоб қилиш;
• чорвачилик маҳсулотлари ишлаб чиқариш ҳажмининг ўзгаришига омиллар таъсири ўрганган ҳолда маҳсулот ишлаб чиқариш ҳажмини кўпайтириш имкониятларини аниқлаш;
• чорвачилик маҳсулотлари ишлаб чиқариш ҳажмини ошириш борасида мавжуд ички имкониятлар ва уларни хўжалик фаолиятига тадбиқ этиш бўйича таклиф ва тавсиялар ишлаб чиқиш.

Чорвачилик тармоғини таҳлил қилиш усуллари худди деҳқончилик тармоғиникига ўхшаш. Аммо чорвачиликнинг ўзига хос хусусияти шундан иборатки, унда ишлаб чиқариш жараёни узлуксиз бўлади.
Чорвачиликнинг ялпи маҳсулоти деганда муайян даврда (одатда бир йилда) шу тармоқда этиштирилган маҳсулотларнинг умумий хажми тушунилади.
Чорвачиликнинг ялпи маҳсулотига гўшт, сут, тухум, жун, қоракул тери, пилла кабилар киради. Шунингдек, қорамолчиликда янги туғилган бузоқлар ва ёш молларнинг ўсиши ҳамда боқишга қўйилган молларга қўшилган тирик вазн ҳам ялпи маҳсулот ҳисобланади.