Mavzu. Bozor sharoitlarida sifat va raqobatbardoshlik. 1 Sifat XXI asr bo’sag’asida raqobatning umumjahon maydoni

Bo'linmalar faoliyatini takomillashtirish ko'rsatkichlari. BFT asosida bo'linma faoliyatining sifatini tavsiflovchi ko'rsatkichlar ro'yxati tuziladi. Guruh "takomillashtirish ko'rsatkichlari" deb nomlanuvchi 3 - 5 ta asosiy ko'rsatkichlarni tanlab olishi zarur. Ularga ko'ra grafiklar tuzilib, har bir bo'linmaga osib qo'yiladi. Har bir grafikda kamida yarim yillik ma'lumotlar va ish sifatining rejalashtirilgan darajasi ko'rsatilishi kerak. Uch oy davomida o'rnatilgan nazorat raqamlarga erishilgandan so'ng, nazorat raqamlari yangilanadi. Shu tarzda bo'linmalar faoliyati uzluksiz takomillashtiriladi.
Ikki turdagi normativlar o'rnatilishi mumkin - iste'molchilarning kutishlariga muvofiq keluvchi ishlar sifatining darajasi va nazoratning kelajakdagi maqsadlar bilan bog'langan me'yoriy hujjatlari. Bunday chizma takomillashtirish bo'yicha faoliyatni to'xtatish g'oyasiga qarshilik qiladi. Ko'rsatkichlar guruhning yig'ilishlarida yangilanishi va qayta ko'rib chiqilishi kerak. Shu tarzda, oraliq maqsadga bosqichma - bosqich erishish hisobiga pirovard maqsadlarga yaqinlashib boriladi.
Muammolarni hal qilish va qarorlarni qabul qilish bosqichi. Bo'linmalar faoliyatini takomillashtirish bo'yicha guruh kelajakdagi maqsadlarni belgilaydi. Bu maqsadlarga bo'linma ishining sifat ko'rsatkichlari majmui sifatida qaraladi. So'ng muammolarni hal qilish usullari yordamida guruh bo'linmaning bu maqsadlarga erishish rejasini ishlab chiqadi; takomillashtirishning yangi maqsadlarini belgilaydi va shundan so'ng yangi tsikl boshlanadi.
Har safar muammoni hal qilishda guruh sifatning oshishi va harajatlarning kamayishini baholashi kerak. Faoliyatni yaxshilash bo'yicha boshqaruv kengashiga baholash natijalari to'g'risida hisobot beriladi.
Bo'linmalar faoliyatini takomillashtirish bo'yicha guruhlarning vazifalari. Bunday guruhlar bo'linma ishchilari va rahbarlarining yaxshilash jarayoniga qiziqishini oshiradi. Har bir ijrochi faoliyatining natijalariga jamoa sezilarli ta'sir ko'rsatadi. Bo'linmaning ishchilari sifat va mehnat unumdorligining oshishiga o'zining munosib hissasini qo'shgan a'zolarini qo'llab - quvvatlaydi. Bu yo'lda mazkur guruhning rahnamoligi ostida jamoaning norasmiy liderlari rahbariyatga ishlab chiqarish vazifalari, me'yorlarini belgilash va ishlarni rejalashtirish masalalarida murojaat qiladilar. Rahbariyat ishni yaxshilash jarayoniga norasmiy liderni jalb qilib, ba'zi hollarda u orqali bo'linma ishchilariga sezilarli ta'sir o'tkazadi.
Afzalliklari: 1) barcha ishchilar ishni yaxshilash jarayonida faol ishtirok etadilar; 2) alohida xizmatlar ko'rsatgan ishchilarni rahbariyat rag'batlantiradi; 3) ishchilarda liderlik xususiyatlari tarkib topadi; 4) muammolarni hal qilish usullari ishlab chiqiladi, shunga mos ko'nikmalar shakllantiriladi va natijada mavjud muammolar hal qilinadi; 5) bo'linma rahbari bo'linma lideri darajasiga erishadi; 6) bo'linma ishchilarida o'zining mehnatidan g'ururlanish hissi ortadi; 7) ishchilar bo'linmaning faoliyatini mustaqil tartibga soladilar; 8) faoliyat tizimi vositasida "iste'molchilar" va "ta'minotchilar" bilan kelishilgan va "iste'molchilar" ning qiziqishlariga xizmat qiladigan mehnat natijalariga talablar belgilanadi; 9) bo'linma doirasida asosiy faoliyat turlarini baholash uchun mezonlar tizimi yaratiladi; 10) ishchilarning maqsadlari bo'linma va tashkilotning maqsad va vazifalari bilan uyg'unlashadi; 11) bo'linma doirasida hal qilib bo'lmaydigan muammolar navbatdagi yuqori pog'onadan o'rin olgan rahbarlarga ma'lum qilinadi; 12) oddiy ishchilar va rahbarlarning o'zaro munosabatlari yaxshilanadi.
Kamchiliklari. Yig'ilishlar o'tkazilganda butun bo'linmaning faoliyati to'xtatiladi. Bu hol bo'linmalar faoliyatini takomillashtirish bo'yicha guruhning asosiy kamchiligi hisoblanadi. Biroq ko'pchilik bo'linmalar tezda mazkur tizimga moslashadilar va ikki oydan so'ng mehnat unumdorligi avvalgi darajalardan osha boshlaydi.
2.Sifat to'garaklari.