Mavzu. Bozor sharoitlarida sifat va raqobatbardoshlik. 1 Sifat XXI asr bo’sag’asida raqobatning umumjahon maydoni

Faoliyatni yaxshilash fondi. Yillik moliyaviy rejaga ko'ra byudjetda ko'zda tutilmagan, sifat va mehnat unumdorligini oshirish loyihalarini amalga oshirish uchun sarflanadigan maxsus fond ajratilishi kerak. Faoliyatni yaxshilash bo'yicha kengash ushbu fondni boshqarishi va kiritilgan investitsiya vositasida mos foyda olishni kafolatlashi kerak. Sotuvning birinchi yilida kiritilgan investitsiyalar uchun rejalashtirilgan foyda harajatlardan kamida ikki - uch barobar ortishi kerak. Agar yil davomida bo'linma yangi loyihani ishlab chiqsa, bu loyihani boshqaruv kengashining muhokamasiga taqdim qiladi va loyiha tasdiqlanganda faoliyatni yaxshilash fondidan mablag' ajratiladi.
Ma'naviy va moddiy rag'batlantirish. Hulq modellariga rioya qilyapgan ishchilarni rag'batlantirish orqali ko'ngilsiz holatlardan qutilish va maqbullarini mustahkamlash ta'minlanadi. Mehnat natijalarini yaxshilash, axloqiy me'yorlarni mustahkamlashda ishchilarni o'rinli ma'naviy va moddiy rag'batlantirishning ahamiyati katta.
Boshqaruv kengashi ma'naviy va moddiy rag'batlantirish rejalarining o'rinli tuzilishi uchun javob beradi. Bu rejalar ishchilarning shaxsiy xususiyatlari va aniq vaziyatlar bilan bog'langan bo'lishi kerak. Rag'batlantirish har doim katta pul qiymatida amalga oshirilmasligi lozim. Gohida minnatdorchilik so'zi, do'stona e'tibor, gazetadagi maqola va sovg'a moddiy rag'batlantirishdan ustun keladi. Alohida ishchi yoki ishchilar guruhi rahbariyat ularning xizmatlarini tan olishi va intilishlarini yuqori baholashini bilishlari muhim.
Boshqaruv kengashi rahbariyatga rag'batlantirishga munosib ishchilarni tavsiya qilishi lozim. Bunday ishchilar rahbariyatning asosiy tayanchidir.
Muvaffaqiyatlarga erishishga intilish. Funktsional bo'linmalarning vakillari o'z bo'linmalarida yaxshilash ishlarini boshqarishi kerak. Agar bo'linmada yangi kontseptsiya ishlab chiqilsa, amal qilinyapgan
kontseptsiyaning yangi qirrasi aniqlansa yoki muhim g'oya shakllansa, bu bo'linmaning vakili boshqaruv kengashiga bu haqida xabar qilishi kerak. Natijada jamoa yoki alohida ijrochi xizmatlari tan olinadi, boshqaruv kengashining barcha a'zolari va boshqa bo'linmalarning ishchilari rag'batlantiriladi. Shu bilan birga, yangilik boshqa bo'linmalarga ham tatbiq etiladi.
4.Boshqaruv tizimi bilan bog'liq muammolarning hal qilinishi.
Faoliyatni yaxshilash bo'yicha boshqaruv kengashi tashkilot doirasidagi o'zaro aloqalarni tahlil qilish imkoniyatiga ega. Bu unga boshqaruv tizimi bilan bog'liq bo'lgan muammolarni aniqlash imkonini beradi. Korxonaning ishi ko'p bo'linmalarni qamrab olar ekan, kamdan - kam hollarda boshqaruv tizimiga umumiy baho beriladi. Bu esa ma'lum sohalarda samara bergan boshqaruv tizimining boshqa bo'linmada joriy etilishi muvaffaqiyatsizlik bilan tugashiga olib keladi.
Bundan tashqari, boshqaruv tizimlari muayyan vazifani hal qilish uchun ishlab chiqiladi, lekin bunda ularning o'zaro aloqador sohalarga ta'siri hisobga olinmaydi. Oqibatda tizim ustida haddan ortiq tekshirishlarning o'tkazilishi va o'zaro kelishuvlarning uzoq davom etishi bunday tizimning o'zini oqlamasligini keltirib chiqaradi.
Boshqaruv kengashi boshqaruvning kompleks muammolarini hal qilish yuzasidan izlanishlar olib borishi va ijrochilarning majburiyatlari, ularga yuklangan topshiriqlarni bajarish muddatlarni belgilashi lozim. Shuningdek, kengash muammolarning oqilona, o'z vaqtida hal qilinishini nazoratga olishi va ko'rilgan choralarning samaradorligini aniqlashi kerak.