Mavzu: biosferadagi tirik moddaning xususiyatlari va funksiyalari

Destruktiv funksiyasi
Nobud bo’lgan organizmlar tarkibidagi organik birikmalarning parchalanishi va minerallashuvi, tog’ jinslarining yemirilishi hosil bo’lgan mineral moddalarning biokimyoviy aylanishiga-biogen migratsiyaga jalb etilishi kabi jarayonlarda namoyon bo’ladi. Natijada biogen moddalar hamda biogen va abiogen hosil bo’luvchi moddalar paydo bo’ladi. Tog’ jinslarining yemirilishi muhim jarayon hisoblanadi, chunki tirik moddaning destruktiv funksiyasi tufayli litosferadan ajralgan mineral moddalar davriy aylanishga qo’shiladi. Bakteriyalar, ko’k-yashil suvo’tlar, zamburug’lar, lishayniklar tog’ jinslarini kimyoviy moddalar yordamida yemiradi. Organik birikmalarning minerallashuvi tufayli hosil bo’lgan kalsiy, natriy, fosfor, kremniy kabi biogen elementlar moddalarning biokimyoviy aylanishiga qo’shiladi.
Muhit yaratish funksiyasi
Muhit ( litosfera, gidrosfera, atmosfera) ning fizik-kimyoviy xususiyatlarini o’zgartirish orqali tirik organizmlar yashashi uchun qulay sharoit yaratish bilan belgilanadi. Ushbu funksiya yuqorida ko’rib o’tilgan energetic va destruktiv funksiyalar bilan bog’liq. Aynan shu funksiya natijasida quyidagi muhim hodisalar ro’y bergan: birlamchi atmosferaning gaz tarkibi va birlamchi ocean suvining tarkibi o’zgaradi, litosferada cho’kindi jinslar qatlami, quruqliklarda esa unumdor tuproq qatlami hosil bo’ladi.
Gaz almashinish funksiyasi
Tirik organizmlar tomonidan gazsimon moddalarni o’zlashtirilishi va ajratilishi orqali atmosferaning gaz tarkibi doimiyligini saqlab turishda aks etadi. Kislorod fotosintez jarayonida, karbonat angidrid esa nafas olish jarayonida ajraladi. Yer ostida hosil bo’ladigan metan gazi metan hosil qiluvchi bakteriyalar tomonidan organik birikmalarning parchalanishi natijasida hosil bo’ladi. Tirik moddaning gaz almashinuv funksiyasiga destruktiv va muhit yaratish funksiyalarining yig’indisi sifatida ham qarash mumkin.
Oksidlash-qaytarilish funksiyasi
Tirik organizmlarda sodir bo’ladigan kimyoviy moddalarning oksidlanish va qaytarilishi jarayonlarida aks etadi. Masalan, fotosintez jarayonida karbonat angidrid gazi uglevodgacha qaytarilsa, nafas olish jarayonida esa uglevodlar karbonat angidrid va suvgacha oksidlanadi. Xemosintezlovchi bakteriyalari faoliyatida temir atomining oksidlanish darajasi o’zgaradi. Oksidlanish-qaytarilish funksiyasi tirik moddaga xos muhit yaratish funksiyasining bir ko’rinishidir.