Mavzu : Suhbat turlari va uning mazmuni. Reja: Suhbat turlari haqida tushuncha. Suhbat turlarining mazmuni

Har bir suhbat 3 qismdan iborat bo‘ladi:
1) suhbatni boshlash; 2) suhbatning borishi; 3) suhbatni yakunlash.
Suhbat ta’limiy faoliyatini tashkil etishda asosiy o‘rinni suhbatni boshlash qismi egallaydi. Suhbatni boshlashda bolalar e’tibori biror-bir narsa yoki suratni ko‘rishga yoki bo‘lmasa , ularga tanish bo‘lgan hodisalarni eslashga qaratiladi. Ba’zan suhbatni quyidagi jumlalarni aytish bilan ham boshlash mumkin: „ Men ko‘pincha o‘ylab qolaman, baliqlar akvariumda o‘zlarini qanday his qilar ekanlar...“, „Bugun men avtobusda emas, trolleybusda kelishimga to‘g‘ri keldi va shunda o‘ylab qoldim, mening bolalarim qanday transportlarga tushish mumkinligini bilisharmikan?“, „Bolalar, kim biladi, mening qo‘limdagi nima?“ Ba’zan tarbiyachi suhbatni suhbat mavzusiga yaqin bo‘lgan topishmoq yoki she’r aytib berishdan ham boshlashi mumkin.
Suhbat ta’limiy faoliyatining borishida tarbiyachining tushuntirishi, ko'rsatmasi, bergan savollari asosiy o‘rinni egallaydi. Suhbat uchun savollarni to‘g‘ri tanlay bilish juda muhimdir. Savollar bolalarga tushunarli bo‘lishi lozim. Shuning uchun bolalarga beriladigan savollarni tuzishda tarbiyachi oldiga quyidagi talablar qo'yiladi:

1. 
   Savol aniq va sodda bo‘lishi kerak.
   
2. 
   Savolni tuzayotgan vaqtda tarbiyachining o‘zi bolalardan qanday javob chiqishini ko‘z oldiga keltirishi lozim.
   
3. 
   Bolalarning idrok qilishlari turlicha bo’lishini hisobga olib , tarbiyachi yordamchi savollar berish orqali asosiy savolning mazmunini bolalarga anglatishi lozim.