Mavzu : Bojxona haqidagi qonun hujjatlarini buzganlik uchun javobgarlik. Reja

4. Kontrabanda jinoyatining tushunchasi va uning uchun javobgarlik.

Jinoyat kodeksining 246-moddasiga ko‘ra, “Kontrabanda” deganda bojxona nazoratini chetlab yoki bojxona nazoratidan yashirib yoxud bojxona hujjatlari yoki vositalariga o‘xshatib yasalgan hujjatlardan aldash yo‘li bilan foydalanib, deklaratsiyasiz yoki boshqa nomga yozilgan deklaratsiyadan foydalanib, kuchli ta’sir qiluvchi zaharli, zaharlovchi, radioaktiv, portlovchi moddalar, portlatish qurilmalari, qurol-yarog‘, o‘qotar qurol yoki o‘q-dorilarni shuningdek giyovandlik vositalari yoki psixotrop moddalarni yoki diniy ekstremizm, separatizm va aqidaparastlikni targ‘ib qiluvchi materiallarni O‘zbekiston Respublikasining bojxona chegarasidan o‘tkazish tushuniladi. Ushbu jinoyatni sodir etgan shaxslar besh yildan o‘n yilgacha ozodlikdan mahrum qilish bilan jazolanadi.

Yadroviy, kimyoviy, biologik va ommaviy qirg‘in qurolining boshqa turlarini, shunday qurollarni yaratishda foydalanilishi mumkinligi ayon bo‘lgan material va moslamalarni, shuningdek giyovandlik vositalari yoki psixotrop moddalarni ko‘p miqdorda kontrabanda yo‘li bilan bojxona chegaralaridan o‘tkazgan shaxslar esa o‘n yildan yigirma yilgacha ozodlikdan mahrum qilish bilan jazolanadi.


Kontrabanda jinoyatining bojxona to‘g‘risidagi qonun hujjatlarini buzish jinoyatidan farqi nimada?
Kontrabanda jinoyati bojxona to‘g‘risidagi qonun hujjatlarini buzish jinoyatidan o‘zining predmeti bilan farqlanadi. Ya’ni O‘zbekiston Respublikasining bojxona chegarasidan noqonuniy o‘tkazilayotgan tovarlar kuchli ta’sir qiluvchi, zaharli, zaharlovchi, radioaktiv, portlovchi moddalar, portlatish qurilmalari, qurol-yarog‘, o‘qotar qurol yoki o‘q-dorilar, shuningdek, giyohvandlik vositalari yoki psixotrop moddalar yoki diniy ekstremizm, separatizm va aqidaparastlikni targ‘ib qiluvchi materiallar, yadroviy, kimyoviy, biologik va boshqa turdagi ommaviy qirg‘in qurollarini yaratishda foydalanilishi mumkin bo‘lgan materiallar hamda moslamalar bo‘lsa bunday noqonuniy qilmish kontrabanda jinoyati deb kvalifikatsiya qilinadi.
Yuqorida ko‘rsatib o‘tilganlardan boshqa tovarlar O‘zbekiston Respublikasining bojxona chegarasidan noqonuniy olib o‘tilganda bunday qilmish bojxona to‘g‘risidagi qonun hujjatlarini buzish jinoyati deb kvalifikatsiya qilinadi.