Матиз”да пиротехника сотмоқчи бўлган шахсга жарима жазоси тайинланди

“Матиз”да пиротехника сотмоқчи бўлган шахсга жарима жазоси тайинланди
Сир эмас Янги йил байрами арафасида пиротехника яъни пақилдоқ савдоси авж олади. Қолаверса, байрамни ўтказиш даврида ҳудудларда жамоат тартибини сақлаш ва фуқаролар хавфсизлигини таъминлаш, шунингдек, ҳуқуқбузарликларнинг барвақт олдини олиш мақсадида профилактик назорат ишлари олиб борилаётган бўлса-да, қулоқни қоматга келтирадиган пақилдоқлар билан боғлиқ нохуш ҳолатлар кундалик турмушда учраб турибди. Яқинда жиноят ишлари бўйича Ўртачирчиқ туман судининг очиқ суд мажлисида шу мазмундаги иш кўриб чиқилди.
Маълум бўлишича, 2022 йилнинг 2 декабрь куни Ўртачирчиқ туманида ИИБ ходимлари томонидан 1993 йил Тошкент шаҳрида туғилган фуқаро Д.Курбанов бошқарувидаги “Матиз” русумли автомашина холислар иштирокида кўздан кечирилган вақтида унинг орқа ўриндиғида жами 35 дона “Танец на льду” номли пиротехника воситалари қонунга хилоф равишда ташилиб, сотиш мақсадида сақлаб келинаётганлиги аниқланиб, пиротехника воситалари ашёвий далил тариқасида олиб қўйилган.
Ушбу ҳолат бўйича ўтказилган суд мажлисида Д.Курбанов айбига тўлиқ иқрорлик билдириб, ҳақиқатдан ҳам автомашинасидан топилган пиротехника воситаларини Тошкент шаҳридан Тошкент вилоятининг Ўртачирчиқ туманига сотиш учун олиб келганлигини, пиротехника воситаларини олиб юриш, сақлаш, ўтказиш, фойдаланиш мумкин эмаслигини билишини, қилмишидан пушаймонлигини, бу ҳолат бошқа такрорланмаслигини, бундан ўзига тегишли хулоса чиқариб олганлигини билдириб, суддан қонуний енгиллик беришни сўради.
Суд мазкур жиноят ишини ҳар тарафлама ва холис ўрганиб чиқиб, ўз қарорини эълон қилди. Унга кўра, Д.Қурбанов Ўзбекистон Республикаси МЖтКнинг 185¹-моддасида кўрсатилган маъмурий ҳуқуқбузарликни содир қилганликда айбдор деб топилиб, унга шу модда билан базавий ҳисоблаш миқдорининг беш баравари миқдорида, яъни бир миллион беш юз минг сўм жарима жазоси тайинланди. Иш бўйича ҳуқуқбузарлик ашёси сифатида олинган пиротехника воситалари эса тегишли тартибда йўқ қилинди.
И.Ёриев
Жиноят ишлари бўйича
Ўртачирчиқ туман суди раиси