Маъмурий-ҳуқуқий нормаларнинг тузилиши

Маъмурий ҳуқуқ манбалари. Маъмурий-ҳуқуқий нормалар кўп сонли ҳуқуқий ҳужжатларда (манбаларда) мустаҳкамланган.
Ҳуқуқ манбалари – ҳуқуқий нормалар ифодасининг ташқи шакллари, ҳуқуқ мавжуд бўлишининг шакллари ҳисобланади.
Ҳуқуқ манбаси деганда – мазкур жамият томонидан ҳуқуқни тушуниш хусусияти билан белгиланган ижтимоий нормаларни мажбурий деб билиш услубини тушуниш керак. Тарихда мажбурий нормалар мавжуд бўлишининг уч шакли маълум: норматив-ҳуқуқий ҳужжатлар, суд преценденти ва ҳуқуқий одат.
Ўзбекистон ҳуқуқ тизимининг роман-герман турига кирадиган ўзига хослиги, норматив-ҳуқуқий ҳужжатларнинг маъмурий ҳуқуқ манбаси сифатидаги устуворлигини белгилайди.
Республикамизда мулкчиликнинг хилма-хил шаклларини вужудга келтириш ва уларга тенг шарт-шароитлар яратиб бериш, корхона, муассаса ва ташкилотлар ўртасида рақобатни авж олдириш, бошқаришнинг олдинги услубидан (маъмурий-буйруқбозлик) бутунлай воз кечиш, иқтисодий омил ва воситаларни кенг жорий этиш – бозор муносабатларининг туб негизидир. Ушбу жараёнда давлат бошқаруви фаолиятини тартибга солувчи бир қатор қонун ҳужжатлари қабул қилинди. Бу қонунчиликнинг асосини - Ўзбекистон Республикаси Конституцияси ташкил этади.