Мамлакатимизда иқтисодий соҳада ислоҳотларни чуқурлаштириш ва эркинлаштириш борасида макроиқтисодий ва молиявий барқарорликка эришиш асосий вазифалардан бири ҳисобланади

КИРИШ
Мамлакатимизда иқтисодий соҳада ислоҳотларни чуқурлаштириш ва эркинлаштириш борасида макроиқтисодий ва молиявий барқарорликка эришиш асосий вазифалардан бири ҳисобланади. Бу эса, иқтисодиёт тармоқларини иқтисодий ва молиявий фаолиятини ҳар томонлама чуқур таҳлил қилиш асосида ички хўжалик имкониятларидан унумлироқ фойдаланишни, илғор тажрибаларни жорий этиш ҳамда сифат кўрсаткичларни муттасил яхшилаб боришни тақозо этади. Зеро, Президентимиз И.А.Каримов таъкидлаганларидек: «2010 йилда ижтимоий-иқтисодий ривожланишнинг энг муҳим мақсади ва асосий устувор вазифаси – бу ислоҳотларни давом эттириш ва чуқурлаштириш, мамлакатимизни янгилаш ва модернизация қилиш, 2009-2010 йилларга мўлжалланган Инқирозга қарши чоралар дастурини сўзсиз бажариш ва шу асосда иқтисодий ривожланишнинг юқори ва барқарор суръатларини, самарадорлигини ҳамда макроиқтисодий мувозанатни таъминлашдан иборатдир» .
Маълумки, 2008 йилда бошланган жаҳон молиявий ва иқтисодий инқирози дунёдаги деярли барча мамлакатларнинг иқтисодиётига ўта кескин таъсир кўрсатмоқда. Республикамизда инқироз оқибатларини бартараф қилиш учун барча хўжалик юритувчи субъектлар мустақил ва молиявий барқарор фаолият юритишлари керак.
Бу эса, ўз навбатида режали иқтисодиёт шароитида шаклланган барча иқтисодий категориялар ва дастакларнинг иқтисодий мазмунига кўра, иқтисодиёт тараққиёт йўлига мос равишда янгилашни тақозо қилади. Булар жумласига иқтисодий таҳлили ҳам киради. Иқтисодий таҳлилининг мақсади фаолият кўрсатаётган хўжалик субъектларининг ишлаб чиқариш ва молиявий фаолиятини уларни бошқарувчиларига яққол кўрсатиб бериш, камчиликларини очиб ташлаш, корхонанинг асосий иқтисодий кўрсаткичларига баҳо бериш ва уларга таъсир этувчи омилларни аниқлаш ҳамда ишлаб чиқариш самарадорлигини ошириш бўйича ички хўжалик резервларини аниқлаш ва уларни ишлаб чиқариш айланмасига жалб қилиш бўйича чора- тадбирлар ишлаб чиқишдан иборат. Бу фанни ўқитишдан кўзланган асосий мақсад-талабаларга иқтисодий таҳлилнинг назарий асосларидан чуқур билим бериш, унинг услуби, усуллари ва турларидан фойдаланган ҳолда корхонани асосий иқтисодий кўрсаткичларига холисона баҳо бериш ва уларнинг ўзгаришига таъсир этувчи омилларни аниқлаш ҳамда ишлаб чиқариш самарадорлигини ошириш бўйича ички хўжалик имкониятларини аниқлаш ва ҳоказо.
Фанни ўқитишда маъруза ва амалий (семинар) машғулотларида кластер, “дидактик ўйинлар”, муаммоли таълим технологиялари,”ақлий ҳужум”, “кичик ўйинлар” каби илғор педагогик технологиялардан фойдаланилади.