Мактабгача тарбия ёшдаги болалар билан ўтказиладиган психологик ташхис

ҲИССИЁТИНГНИ КЎЗИНГ БИЛАН ИФОДАЛА
Мақсад: болаларни ўзларини намоён қилишга ёрдам бериш.
Тарбиячи ва бола навбатма-навбат қандайдир ҳиссиётни ўйлаб топиб, кўзлари орқали ифодалашга ҳаракат қилишади. Бошқа болалар эса у ёки бу бола қандай ҳиссиётни ифодалаётганлигини топишлари керак. Бу машқда кўздан бошқа юз қисмларини яшириш керак бўлади, масалан, кўзлари очиқ маска ясаш мумкин.
БАХТЛИ БЎЛИШНИ ХОҲЛАЙМАН
Мақсад: болаларда ўзига ҳурмат ҳиссини ривожлантириш.
Бошловчи болаларга қуйидаги эртакни сўзлаб беради:
"Бир мушукча бор экан. У катта бўлганида бахтли бўла олиши ҳақида жуда кўп қайғурар экан ва шунинг учун доимо онасидан сўраркан:
- Ойи! Мен бахтли бўла оламанми?
- Билмайман, болажоним. Мен буни жуда ҳам хоҳлайман, лекин ўзим ҳам билолмайман, - деб жавоб берди онаси.
- Ким билади? - деб сўрабди мушукча.
- Балки осмон, балки шамолдир. Балки, қуёшдир. Улар узоқда ва баландда - балки уларга кўринар, - деб, кулиб жавоб берди онаси.
Шунда мушукча шамол, осмон, қуёш билан ўзи гаплашишга аҳд қилди. У ҳовлидаги энг баланд қайин дарахтининг учига чиқиб, шундай бақирди:
- Эй, осмон! Эй, шамол! Эй, қуёш! Мен бахтли бўлишни хоҳлайман! Шунда у кимнингдир бўғиқ ва кучли овозини эшитди:
- Агар бахтли бўлишни хоҳласанг - демак албатта бахтли бўласан!"
Болалар эртакни тинглаб бўлганларидан сўнг, уни саҳналаштиришади. Ҳар бир бола навбати билан доира марказида турган стулга чиқиб, мушукчанинг охирги сўзини бақириб айтади., гуруҳдагиларнинг барчаси унга жавобан шундай дейдилар: "Сен бахтли бўлишни хоҳласанг - демак албатта, бахтли бўласан".
БАХТЛИ БЎЛИШ УЧУН МАШҚ
Мақсад: болаларда ўзига ҳурмат ҳиссини ривожлантириш.
Бошловчи болалардан кўзларини юмиб ўзларини жуда бахтиёр тасаввур қилишларини сўрайди. Улардан тасаввур қилаётган манзаралари қаерда содир бўлаётганлиги ва ён атрофларида ким турганлигини ҳаёлан кўришлари сўралади. Сўнгра болалар ўзларининг ҳаёлларини расм орқали тасвирлаб берадилар.