Magnoliyatoifa-Magnoliophyta yopiq urug’lilar

Nilufardoshlar oilasi-Nymphaceae

• Bu oilaga gulli o’simliklarning eng qadimgi oilalaridan hisoblanib, oilaga 5 ta turkum, 70 ta tur kiradi. Oila vakillari suvda o’sadigan ko’p yillik o’t o’simliklar bo’lib, suv yuzasida suzib yuruvchi, uzun bandli katta barg plastinkasi bo’ladi. Ildiz poyasi yaxshi rivojlangan. Guli ikki jinsli, gulqo’ron bargchalari, changchilari ham ko’p; urug’chisi 3 ta yoki qo’shilib o’sgan bir qancha mevachabarglardan iborat. Tugunchasi ustki, bir uyali. Mevasi yong’oqcha yoki rezavorsimon.

• Oq nilufar - Nymphaea candida. O’zbekistonda oilaning bitta oq nilufar- N.Candida nomli turi suvda o’sadi. Gullari yirik, oq rangli, gulkosachasi 4 - 5 ta, gultojbarglari 12 ta va undan ko’p. Changchisi esa 20 ta va undan ko’p. Barglari ham yirik, 12-30 sm uzunlikda, dumaloq, yuraksimon uzun bandli, suv betida suzib yuradi. Mevasi ko’p urug’li rezavorsimon, suv ostida yetiladi. Urug’i qora rangli, etli, endospermli, urug’ po’stida maxsus urug’ni suvda suzib yurishga yordam beruvchi havo bo’shliqlari (arrilus) bo’ladi. Bu urug’lar suv oqimi bilan hamda baliqlar tomonidan yeyilishi sababli har tarafga va uzoq Yerlarga tarqaladi. Ildizpoyali, ko’p yillik o’t o’simlik bo’lib, ko’llarda, daryo havzalarida uchraydi.

• Nilifardoshlar oilasining yana bir turkumidan Viktoriya regiya hisoblanadi. Bu o’simlik Amazonka daryosining havzasi atrofida o’sadi, uning barglari 2 m. cha kenglikda bo’lib, suvda qalqib turadi va 50 kg gacha yukni ko’tara oladi. Gullarining diametri 35 sm gacha boradi. Viktoriyalar ko’pincha birinchi yildayoq gullaydigan bir yillik o’simliklar qatorida oranjeriyalardagi maxsus hovuzlarda o’stiriladi Gul formulasi * ♀♂ Са 4 Со ~ А~ G~