Лойиҳа «Аёллар маслаҳат кенгаши» тўғрисида

4-боб. Кенгашни шакллантириш ва унинг фаолиятини ташкил этиш

12. Кенгаш фуқаролар йиғини (фуқаролар вакилларининг йиғилиши) томонидан 10-15 нафар аъзодан иборат таркибда тузилади.

Кенгаш аъзолари сони фуқаролар йиғинидаги аҳоли сонига ҳамда иш ҳажмига қараб белгиланади.
13. Кенгаш таркибига фуқаролар йиғини раисининг оила, хотин-қизлар
ва ижтимоий-маънавий масалалар бўйича ўринбосари, оила ва хотин-қизлар масалалари бўйича мутахассис, маҳаллада истиқомат қиладиган ҳамда катта ҳаётий ва амалий тажрибага, аҳоли орасида обрў-эътибор эга бўлган аёллар, зиёли онахонлар, тадбиркор аёллар, ҳудуддаги таълим ва тиббиёт муассасаларининг аёл раҳбар ходимлари, отинойилар киритилиши мумкин.
14. Кенгаш фаолиятига қоида тариқасида, фуқаролар йиғини раисининг оила, хотин-қизлар ва ижтимоий-маънавий масалалар бўйича ўринбосари раҳбарлик қилади.
15. Кенгаш раиси:
Кенгаш фаолиятга умумий раҳбарлик қилади;
Кенгаш мажлисларни чақиради ва раислик қилади;
Кенгашнинг жорий ишларини ташкил қилади;
фуқаролар йиғини, фуқаролар йиғини кенгаши мажлисларида унинг номидан вакил бўлади;
Кенгаш номидан чиқадиган ҳужжатларни ҳужжатларини имзолайди;
Кенгаш фаолиятига оид ўқув-услубий кўрсатмалари ҳақида ходимларни ўз вақтида хабардор қилади ва ижросини амалга оширилишини таъминлайди;
Кенгаш фаолиятини таҳлил қилиш ва уни янада такомилаштириш бўйича тадбирлар ишлаб чиқади;
Кенгашнинг самарали ишини таъминлаш бўйича бошқа ваколатларни амалга оширади.
Кенгаш раиси ушбу Низомда белгиланган вазифаларни кенгаш аъзолари ўртасида тақсимлайди ҳамда Кенгаш аъзолари томонидан ўзларига юклатилган вазифаларнинг бажарилишини таъминлайди.
16. Кенгаш ўзининг биринчи ташкилий йиғилишида аъзолар ичидан Кенгаш раисининг ўринбосарини ва Кенгаш котибини сайлайди.
Кенгаш раисининг ўринбосарининг вазифалари Кенгаш раиси томонидан фуқаролар йиғини кенгаши билан келишилган ҳолда белгиланади. Кенгаш раиси узрли сабабларга кўра бўлмаган ҳолларда раис ўринбосари унинг вазифасини бажаради.
17. Кенгаш котиби йиғилишларнинг баёнини юритади ва қарорлар ижросини назорат қилади.
18. Кенгаш фуқаролар йиғини ҳудудидаги мактаблар, маданият масканлари, коллежлар, оилавий поликлиника ва шифокор пунктлари, санаторий, дам олиш масканлари биносида (алоҳида жойдан кириб-чиқиш учун шароит бўлган) Кенгаш учун ажратилган 2 та хонада фаолият кўрсатади.
19. Кенгаш хоналари ушбу Низомнинг иловасига мувофиқ жиҳозланади.
20. Кенгашни зарур жиҳозлар билан таъминлаш, хоналарни таъмирлаш, Кенгаш аъзоларини моддий рағбатлантириш маҳаллий бюджет маблағлари, юридик ва жисмоний шахсларнинг ҳомийлик хайриялари, шунингдек қонун ҳужжатларида тақиқланмаган бошқа манбалар ҳисобидан амалга оширилади.
21. Кенгашнинг иш фаолияти усуллари:
индивидуал суҳбат;
индивидуал маслаҳат (таълим олиш, иш фаолиятидаги муаммолар, шахслараро муносабатлар, шахсий муаммолар бўйича);
анкета;
психологик ташхислаш;
психологик, педагогик ва ҳуқуқий маслаҳат, психологик коррекция;
тренинг (ўзаро муносабатлар ва касбий муваффақиятга эришишга кўмаклашувчи қизиқарли ва самарали машқлар);
давра суҳбати;
маънавий-маърифий тадбир;
психолог билан психологик компетентлилик ва юзага келаётган муаммоли вазиятларни самарали ечиш кўникмасини ривожлантирувчи турли формат (маъруза, семинар, клуб)да тематик учрашувлар.
22. Кенгаш ўз фаолияти юзасидан ҳар ойда фуқаролар йиғини кенгашига, йилнинг ҳар чорагида фуқаролар йиғинига ҳисобот бериб боради.
23. Кенгаш фаолиятини туман (шаҳар) Хотин-қизлар жамоатчилик кенгашлари мувофиқлаштиради, услубий-амалий жиҳатдан кўмаклашади, чораклик, ярим йиллик ва йиллик фаолиятини мониторинг қилади.
24. Туман (шаҳар) Хотин-қизлар жамоатчилик кенгашлари аъзолари фуқаролар йиғинларига мувофиқлаштирувчи сифатида бириктирилади.