Lingvistika (fransuz tili) mutaxassisligi ikkinchi bosqich magistranti Amonova Shohida Vali qizining ilmiy-pedagogik amaliyot davrida yuritgan kundaligi amaliyotning boshlanishi

2022- yil 20- aprel
Har doimgidek Universitetga o’z vaqtida keldim, kafedraga kirib, o’qituvchilar bilan salomlashdim, universitet yangiliklari borasida fikrlar almashdik.
Menga biriktirilgan guruh tomonga yo’l oldim. Hali dars boshlanishiga biroz vaqt borligi sabab, guruh talabalari hali to’liq kelib ulgurishmagan ekan, kelganlari bilan sinf xonasini darsga tayyorladik. Asta-sekinlik bilan boshqa talabalar ham kelishdi. Ular bilan ozgina suhbatlashdim. Darslarida qiyinchiliklar bormi, deb so’radim. Rus tili fanidan ozgina qiynalyapmiz, deb aytishdi. Ularga, rus tili dunyodagi eng rivojlangan tillardan biri ekanligi, u ilm-fan va texnikaning barcha sohalarida boy lug’at va terminologiyaga ega ekanligini aytdim va bu tilni hozir yaxshilab o’rganib olishsa, kelajakdagi imkoniyatlari ham shunga binoan ko’payishini ta’kidladim. Talabalar xursand bo’lishdi.
Kafedraga qaytdim va payshanba kuni bo’lib o’tadigan darsga navbatdagi mavzu yuzasidan materiallarimni to’ldirishga kirishdim.
Shu bilan bugungi amaliyot kunimni tugatib, uyga qaytdim.
2022- yil 21- aprel
Amaliyotning navbatdagi kuni boshlandi.
Amaliyotchi magistrant sifatida o’qituvchilik kasbi murakkab va sharafli kasb ekanligini, ayniqsa, hozirgi davrda, his qilib turibman. Ishda yuz beradigan qiyinchiliklarni bartaraf etishni ham o’rganish lozim. Bu uchun esa zarur kasbiy sifatlarni o’zimda shakllantirsam, yaxshi bo’ladi. Eng muhimi shuni bilamanki, men uchun talabalar bilan ishlash nihoyatda qiziqarli va maroqli. Kasbimni to’g’ri tanlaganimga ishonchim komil. Shu mulohazalar bilan ma’lumotlar to’pladim, tahlil qildim.
Keyin amaliyotchi magistrlar bilan amaliyot hujjatlarimizni tartibga soldik ,bir-birimiz bilan fikr almashdik. Birgalikda dars tahlillariga kirib, pedagogic mahoratimizni yana bir bor oshirdik.
2022- yil 22- aprel
Yaxshi kayfiyatda Universitetga qarab yo’l oldim. Kafedraga kelib, hamma bilan salomlashdim va menga biriktirilgan guruhning tyutoti N.Nurillayeva bilan “Axborot va murabbiylik soati” ni o’tish maqsadida 509- auditoriya tomon yo’l oldik. Talabalar bilan salomlashdik va axborot soatini boshladik. Talabalardan dunyoda bo’layotgan yangiliklar xususida so’rab, qo’shimchalar kiritdik, fikr almashdik. Darsimiz qiziqarli o’tdi.
Bugun yana Amaliyot rahbarim f.f.f.d N.B.Kuldashevaning darslariga ko’nikma va malakamni oshirish maqsadida tahlilga kirdim. Bu darsda 11-1fra-19 guruh talabalari bilan TO”MA fani olib borildi. Darsda audio material va shunga doir topshiriqlardan foydalanishdi.