Laboratoriya ishi

Qisqacha nazariy ma’lumotlar

Daraxt – bu chiziqli bo’lmagan bog’lamli ma’lumotlar tuzilmasidir (2.3.1-rasm).



2.3.1-rasm

Daraxtlar quyidagi belgilari bilan tavsiflanadi:

- daraxtda ildiz deb ataluvchi shunday yagona element mavjudki, unga boshqa elementlardan murojaat mavjud emas;

- daraxtda ixtiyoriy elementga murojaat (element qiymatini olish) chekli sondagi ketma-ket murojaatlar yoki ko’rsatkichlardan o’tib borish orqali amalga oshiriladi;

- har bir element o’zidan oldingi faqat bitta element bilan bog’lanadi.

Daraxtdagi darajalar soni balandlik deb ataladi. Masalan 2.3.1-rasmdagi daraxtning balandligi 4 ga teng.

Daraxtning tugunidan o’sib chiquvchi shoxlar soni tugunning shoxlanish darajasi deyiladi. Masalan, 2.3.1-rasmdagi 2 element uchun shoxlanish darajasi 2 ga, 3 element uchun esa 3 ga teng. Shoxlanish darajasi bo’yicha daraxtlar quyidagi sinflarga ajratiladi:

1) agar shoxlanish darajasi m ga teng bo’lsa, bunday daraxt m-ar daraxt deyiladi;

2) agar shoxlanish darajasi yoki 0, yoki m ga teng bo’lsa, bunday daraxt to’liq m-ar daraxt deyiladi;

3) agar shoxlanish darajasining maksimal qiymati 2 ga teng bo’lsa, bunday daraxt binar (ikkilik daraxt) deyiladi;

4) agar shoxlanish darajasi yo 0 ga, yo 2 ga teng bo’lsa, bunday daraxt to’liq binar daraxt deyiladi.

Daraxtlarni tasvirlash. Kompyuter xotirasida daraxtlarni bog’lamli ro’yxat shaklida tasvirlash tavsiya etiladi. Bu ro’yxatning elementlari tugunning qiymati va shoxlanish darajasi sonini saqlovchi axborot maydoniga hamda shoxlanish darajasiga teng bo’lgan ko’rsatkichlar maydoniga ega bo’ladi. Elementning ixtiyoriy ko’rsatkichi ushbu tugunni o’zining o’g’il-tugunlariga yo’naltiradi (2.3.2-rasm).



2.3.2-rasm. Daraxtning kompyuter xotirasida tasvirlanishi