Labora-toriya jumislari

Júrek poroklarındaǵı shawqımlardıń eń jaqsı esitiletuǵın jeri hám diagnostik áhmiyeti.
Júrek porokların bir- birinen parıqlaw ushın shawqım eń jaqsı esitiletuǵın jerdi biliw kerek. Poroklar júrektiń 4 jerinde rawajlanǵanlıǵı ushın, shawqımlar da júrektiń 4 jerinen eń jaqsı esitiledi.
1) Júrektiń shep tárepinde rawajlanǵan poroklardaǵı shawqımlar júrektiń shep tárepinde, atlarda 5-shi, basqa haywanlarda 4-shi qabırǵa arasınan, jelke-kòkirek buwını sızıǵınan 3-4 sm tómende eń kúshli esitiledi. Sistolık shawqım esitilse - bul eki qaqpaqlı klapannıń jetispewshiligi, diastolık shawqım esitilse - shep atrioventrikulyar tesiginiń tarayıwı bolıp tabıladı. 2) Aorta tesiginde rawajlanatuǵın poroklardaģı shawqımlar júrektiń shep tárepinen, 4-shi qabırǵa arasında, jelke - kòkirek buwını sızıǵı astınan kúshli esitiledi. Sistolık shawqım esitilse - bul aorta tesiginiń tarayıwı, diastolık shawqım esitilse aorta yarım ay tárizli qaqpaqtıń jetispewshiligi bolıp tabıladı. 3) Ókpe arteriyasında rawajlanatuǵın poroklardaǵı shawqımlar júrektiń shep tárepinen, 3 qabırǵa arasından, jelke - kòkirek buwını sızıǵınan 5-6 sm tómende kúshli esitiledi. Sistolık shawqım esitilse - bul ókpe arteriyası tesiginiń tarayıwı, diastolık shawqım esitilse - ókpe arteriyası yarım ay tárizli qaqpaqtıń jetispewshiligi bolıp tabıladı. 4) Júrektiń ońında rawajlanatuǵın poroklardaǵı shawqımlar júrektiń ońınan, 4- qabırǵa arasınan, jelke - kòkirek buwını sızıǵınan 4-5 sm tómende kúshli esitiledi. Sistolık shawqım esitilse - úsh qaqpaqlı klapannıń jetispewshiligi, diastolık shawqım bolsa - oń atrioventrikulyar tesiginiń tarayıwı bolıp tabıladı.
Endokardial shawqımlardıń diagnostik áhmiyeti sonnan ibarat, bul shawqımlardıń esitiliwi qaqpaqlar jetiwpewshiligi yamasa tesiklerdiń tarayıwı nátiyjesinde júrek jumısınıń buzılǵanlıǵınan derek beredi. Kúshli hám turaqlı shawqımlardıń esitiliwi ótkir endokardit keselliginen derek beredi. Bul kóbinese ótkir gripp, shoshqalardıń saramas, revmatizm, revmokardit h.b. keselliklerde ushıraydı.
Egerde endokardial shawqımlar kúshsiz bolıp, sistola dáwirinde esitilse hám haywan júrgende, islegende joǵalsa, júrektiń funkcional ózgeriwinen derek beredi.
Júrekti auskultaciya etip, endokardial shawqımlardı esitkennen keyin, haywandaǵı keselliktiń basqa belgilerine de itibar beriledi, asıqpastan anamnez maǵlıwmatları toplanadı, júrek túrtkisi hám arteriya, vena pulslerı dıqqat penen tekseriledi.
Alınǵan maǵlıwmatlardı dıqqat penen úyreniw nátiyjesinde júrek poroklarına anıq diagnoz qoyıladı.