Konsullik xizmatlari

XII bob. KONSULLIK YIG‘IMLARI

71-modda.

Konsullik harakatlari uchun konsullik yig‘imlari undiriladi.

Mazkur harakatlarni bajarish bilan bog‘liq holda qilingan xarajatlar ham qoplanishi lozim.

 LexUZ sharhi

Qarang: “Konsullik harakatlarini bajarish bilan bog‘liq haqiqiy xarajatlarni qoplash uchun yig‘imlar undirish va kelib tushgan pul mablag‘laridan foydalanish tartibi to‘g‘risida”gi nizom (ro‘yxat. 1273-son, 18.09.2003-y.).

72-modda.

Konsullik yig‘imlari O‘zbekiston Respublikasi konsullik yig‘imlari tarifiga muvofiq, ya’ni: chet elda — konsullik joylashgan davlatning valyutasida yoki erkin ayirboshlanadigan valyutada; O‘zbekiston Respublikasida — milliy valyutada yoki erkin ayirboshlanadigan valyutada undiriladi.

Konsullik yig‘imlarining tariflari O‘zbekiston Respublikasi Vazirlar Mahkamasi tomonidan tasdiqlanadi.

 LexUZ sharhi

Qarang: O‘zbekiston Respublikasi Vazirlar Mahkamasining 1993-yil 19-avgustdagi 423-sonli qarori bilan tasdiqlangan “O‘zbekiston Respublikasi konsullik yig‘imlarining tarifi”.

73-modda.

Konsullik yig‘imlari quyidagi hollarda undirilmaydi:

a) konsullik yig‘imlarini undirishdan voz kechish to‘g‘risida O‘zbekiston Respublikasi va konsulxona joylashgan davlat ishtirokchi bo‘lgan xalqaro shartnoma mavjud bo‘lsa;

b) O‘zbekiston Respublikasi fuqarolarini repatriatsiya qilish ishlari bo‘yicha;

v) chet el diplomatiya pasportlariga bahamlik asosida viza qo‘yganlik uchun;

g) mehnat staji, fuqarolarning ijtimoiy ta’minoti to‘g‘risidagi, alimentlar undirish to‘g‘risidagi ishlarga doir hujjatlar so‘rab olinganligi va qonunlashtirilganligi uchun;

d) O‘zbekiston Respublikasining qonun hujjatlarida nazarda tutilgan boshqa hollarda.

 LexUZ sharhi

Qarang: O‘zbekiston Respublikasi Vazirlar Mahkamasining 1993-yil 19-avgustdagi 423-sonli qarori bilan tasdiqlangan “O‘zbekiston Respublikasi konsullik yig‘imlarining tarifi”.