Konsullik xizmatlari

VII bob. KONSULNING FUQAROLIK, PASPORT, VIZA MASALALARIGA HAMDA FUQAROLIK HOLATI DALOLATNOMALARINI YoZISh MASALALARIGA DOIR VAZIFALARI

41-modda.

Konsul uning konsullik okrugida istiqomat qilib turgan shaxslarning O‘zbekiston Respublikasi fuqaroligi masalalariga doir arizalarini qabul qilishi shart.

42-modda.

Konsul chet elda doimiy yashab turgan O‘zbekiston Respublikasi fuqarolariga, shuningdek qonunga muvofiq O‘zbekiston Respublikasi fuqaroligini olgan shaxslarga O‘zbekiston Respublikasi fuqarosi pasportini berish hamda uni almashtirib berish huquqiga ega.

43-modda.

Konsul O‘zbekiston Respublikasiga kirish, O‘zbekiston Respublikasidan chiqib ketish va O‘zbekiston Respublikasi hududi orqali tranzit o‘tish uchun vizalar berish, ularning muddatini uzaytirish, ularni bekor qilish, shuningdek berilgan vizalarga o‘zgartishlar kiritish huquqiga ega.

44-modda.

Konsul O‘zbekiston Respublikasining qonun hujjatlariga muvofiq O‘zbekiston Respublikasi fuqarolarining fuqarolik holati dalolatnomalarini yozadi.

Konsul chet elda doimiy yashab turgan O‘zbekiston Respublikasi fuqarolarining fuqarolik holatini qayd etish yozuvlariga o‘zgartishlar, tuzatishlar, qo‘shimchalar kiritish to‘g‘risidagi, yo‘qotib qo‘yilgan yozuvlarni qayta tiklash, shuningdek familiyasi, ismi va otasining ismini o‘zgartirish haqidagi iltimosnomalarini qabul qilib oladi hamda ularni qarab chiqish uchun vakolatli organlarga yuboradi.

45-modda.

Konsul O‘zbekiston Respublikasining havo, dengiz, daryo kemasida biron shaxsning tug‘ilganligi yoki vafot etganligi to‘g‘risida ma’lumot olgach, O‘zbekiston Respublikasining amaldagi qonun hujjatlariga muvofiq tug‘ilganlik yoki vafot etganlik to‘g‘risidagi holatni ro‘yxatga oladi.

46-modda.

Oldingi tahrirga qarang.

Konsul tomonidan fuqarolik holati dalolatnomalarini qayd etish O‘zbekiston Respublikasi Vazirlar Mahkamasi tasdiqlaydigan fuqarolik holati dalolatnomalarini qayd etish qoidalariga muvofiq amalga oshiriladi.

 LexUZ sharhi

Qarang: O‘zbekiston Respublikasi Vazirlar Mahkamasining 1999-yil 12-apreldagi 171-sonli qarori bilan tasdiqlangan “Fuqarolik holati dalolatnomalarini qayd etish qoidalari”.

(46-modda O‘zbekiston Respublikasining 1998-yil 25-dekabrdagi 729-I-son Qonuni tahririda — Oliy Majlis Axborotnomasi, 1999-y., 1-son 20-modda)