Ko‘hna vohaning “tashrif qog‘ozi”

Malayziyaliklar quvonchi
Ertalabki ilk manzilimiz Romitan tumani Qo‘rg‘on qishlog‘idagi Xoja Ali Romitaniy ziyoratgohi bo‘ldi. Ushbu zot xojagon-naqshbandiya tariqatining yirik namoyandasi. Xojai Azizon degan yuksak nomga musharraf bo‘lgan. Uning “Risolai Azizon” kitobi turli tillarga tarjima qilinib, butun jahonga tarqalgan.

— Ushbu ulug‘ zot butun umr “uzmoq va ulamoq” ishqida yashagan, deyish mumkin. Ya’ni zohiran turli rangdagi iplarni uzib-ulab, mato to‘qib, tirikchilik qilgan bo‘lsa, botinan qalbi va ruhini Allohga bog‘lab umrini o‘tkazgan, — deydi ziyoratchilardan biri, mehnat faxriysi navoiylik Gulnora Norqulova. — Bunday qutlug‘ avliyolarning aytgan har bir so‘zi, hayoti biz uchun ibrat. Ziyorat davomida farzandu nabiralarimga buni ko‘p-ko‘p ta’kidlayapman.

Yetti pirning barcha qadamjosida bo‘layotgani kabi bu yerda ham katta bunyodkorlik ishlari olib borilmoqda. Usta Muzaffar Mirzayev ziyoratgoh hududida uch gumbazli darvozaxona, maqbara, minora, hovuz, kushxona va boshqa inshootlarga yondosh qilib hunarmandlar rastalari ham tiklanayotganini ta’kidladi.

— Piri komilning ezgu ishlari bugun ham avlodlari tomonidan davom ettirilayotgani ramzi sifatida mazkur imoratlarda hunarmandlar ipakdan turli qimmatbaho matolar, atlasu adraslar, gilamlar to‘qishi va ularning savdosi bilan shug‘ullanishi uchun barcha imkoniyat yaratiladi, — deydi usta. — Majmuada sayyohlar uchun ham ko‘rsa havas qilgulik qulayliklar muhayyo etiladi. Jumladan, zamonaviy mehmonxona qad rostlaydi. Bu ishlar yakuniga yetgach, ushbu hududning sayyohlik salohiyati keskin oshadi. Negaki, qadamjo yonida necha ming yillik tarixga ega ko‘hna Qo‘rg‘on qishlog‘i bor. Bu yerda fransiyalik mutaxassislar bilan hamkorlikda arxeologik qazishma ishlari olib borilyapti. Topilmalar jamoatchilikning bu yerga qiziqishini yanada oshirishi, shubhasiz.

Romitan tumanining Samos qishlog‘i tomon yursangiz, yana bir tarixiy majmua qarshingizdan chiqadi. Bu yerda ma’naviy komillik timsoliga aylangan yana bir mo‘tabar zot — Muhammad Boboyi Samosiy qabri va maqbarasi bor.

Xalq ushbu avliyoni kelajakni oldindan ko‘ra olgan, deb biladi. Xususan, u zot bir guruh muridlari bilan Buxoro yaqinidagi qishloqdan o‘tib ketayotganda “Bu tuproqdan bir er isi kelmoqda”, deb Bahouddin Naqshbandning dunyoga kelishini bashorat qilgani rivoyatga aylangan.

Amalga oshirilayotgan keng ko‘lamli bunyodkorlik ishlaridan ziyoratgoh yanada ko‘rkamlashmoqda. Atrofdagi so‘lim bog‘dan esgan mayin shabboda, qanotlarini keng yozib, tovlangan tovuslar, barq urib ochilgan noyob gullar ziyoratdan halovat topgan bahridilingizni yanada ochib yuboradi.

— Aziz-avliyoning qadamjosi tubdan ta’mirlanayotgani nafaqat qishlog‘imiz ko‘rkiga ko‘rk qo‘shmoqda, balki bu yerdagi muhitni yaxshilab, odamlarning kayfiyatini yanada ko‘tarmoqda, — deydi “Boboyi Samosiy” mahalla fuqarolar yig‘ini faoli Abdulatif Shirinov. — Shu yerda tug‘ilib-o‘sgan inson sifatida bilaman: ziyoratgoh bir vaqtlar tamoman e’tiborsiz qolgan edi. Uning hozirgi jamolini ko‘rgan yoshlar uchun bu ertakday gap. Muhimi, bugun majmua har qachongidan ham obod, bu yerda ziyoratchilarga barcha sharoit muhayyo.

Majmuaga kelgan bir guruh turistlar Malayziyadan ekan. Ular Xoja Boboyi Samosiy qadamjosini ziyorat qilganidan g‘oyat xursand ekanini aytishdi.

— O‘zbekiston zaminida tug‘ilgan ko‘plab allomalar islom olamida chuqur iz qoldirgan, — deydi sayyohlardan biri Bin Hasan Jamalidin. — Bunday ajdodlaringiz bilan haqli ravishda faxrlansangiz arziydi. Bizda Naqshbandiya tariqati keng tarqalgan. Shu bois ko‘plab vatandoshlarimiz Yetti pir qadamjosini ziyorat qilishni, xalqingizning boy madaniyati bilan tanishishni istaydi. Turizm maqsadida 30 kundan ortiq bo‘lmagan muddatga O‘zbekistonga keluvchi Malayziya fuqarolari uchun viza rejimi bekor qilingani ayni muddao bo‘ldi. Biz bundan juda mamnunmiz.