Kecha kim edigu bugun kim bo‘ldik?

Mamlakatimiz rahbari ta’kidlaganidek biz musaffo dinimizni hamisha hurmat qilamiz. Din bilan aqidaparstlik butunlay boshqa-boshqa narsa. Bugungi yoshlar buning farqini yaxshi tushuna boshladi. Bizning dinimiz — tariximiz, madaniyatimiz bilan chambarchas bog‘liq. Sho‘ro davrida Qur’ondan xabardor bo‘lish, ilmiy ish qilish uchun Krachkovskiyning ruscha tarjimasini o‘qishga markazdan ijozat olish kerak bo‘lgan ekan. Vaholanki, Krachkovskiyning tarjimasini o‘qib, hech narsani tushunib bo‘lmaydi. Bu tarjima Qur’on to‘g‘risida tasavvur ham uyg‘otmaydi. Ne baxtki, Islom Karimov respublikamizga rahbar bo‘lgach, hali mustaqillik e’lon qilinmasdan «Sharq yulduzi» jurnalida Qur’oni karim o‘zbek tilida nashr etildi. Istiqlolning dastlabki shamoli xalqimizga Quro’nni, dinni tanitdi. Imom Buxoriyni bilarmidik? Shunchaki ismi tanish bo‘lishi mumkin, aslida uni butun dunyo taniydi. Haj safariga borganda, butun dunyodan tashrif buyurgan musulmonlarni ko‘rasiz. Ular qayerdan kelganingizni so‘raydi. Imom Buxoriyning yurtidan, desangiz, o‘zgacha hurmat bilan qayta ko‘rishadi. Alohida iltifot bilan «sizlar dunyodagi eng katta ulamoning avlodlarisiz», deyishadi. Biz bularni istiqlolgacha bilgan emasmiz. Bahovuddin Naqshband butun dunyo ulamolarining piri murshidi sanaladi. Ana shunday ulug‘ zotning maqbarasi qulflangan turar edi va u yerga hech kim kirgizilmagan. Mustaqillikdan so‘ng Prezidentimiz tashabbusi bilan bu ziyoratgoh boshqa ziyoratgohlar qatorida obodonlashtirildi.