Кўчмас мулк ва мулк ҳУҚУҚи амалий қўлланма

69
2 .1 .5 . ЕР УЧАСТКАСИГА БЎЛГАН ҲУҚУҚНИ ТАСДИҚЛОВЧИ 
ҲУЖЖАТЛАР ВА БУНДАЙ ҲУҚУҚЛАРНИ ДАВЛАТ 
РЎЙХАТИДАН ЎТКАЗИШ
Ер кодексининг 33-моддасига кўра қуйидагилар ер участкасига бўлган 
ҳуқуқни тасдиқловчи ҳужжатлар ҳисобланади:
●
ер участкасига доимий эгалик қилиш ҳуқуқини берувчи давлат 
ҳужжати;
●
ер участкасидан доимий фойдаланиш ҳуқуқини берувчи давлат 
ҳужжати;
●
ер участкасига мерос қилиб қолдириладиган умрбод эгалик қилиш 
ҳуқуқини берувчи давлат ҳужжати;
●
ер участкасига бўлган мулк ҳуқуқини берувчи давлат ордери;
●
ер участкаси ижараси шартномаси ёки ер участкасидан муддатли 
фойдаланиш шартномаси;
●
ер участкасига бўлган ҳуқуқни давлат рўйхатига олиш тўғрисидаги 
гувоҳнома.
Бундай ҳужжатларда ер участкаси қайси ҳуқуққа асосан берилаётганлиги, 
ер участкасидан фойдаланишнинг белгиланган мақсади, уни ўзлаштириш 
муддатлари, ер участкасини сақлаш вазифалари ва сервитутлар кўрсатилади.
“Давлат ер кадастри тўғрисида”ги Қонуннинг 13-моддасига кўра ер 
участкаларига эгалик қилиш, улардан фойдаланиш ҳуқуқини, ер участкаларини 
ижарага олиш ҳуқуқини, шунингдек ер участкаларига бўлган мулк ҳуқуқини, шу 
жумладан, сервитутлар тўғрисидаги битимлар ва бу ҳуқуқларга доир бошқа 
чеклашларни давлат рўйхатига олиш туман (шаҳар) ер кадастри дафтарига
тегишли маълумотларни киритиш орқали ер участкаси жойлашган ерда амалга 
оширилади.
Ер участкаларига эгалик қилиш, улардан фойдаланиш ва ижара 
ҳуқуқида, шунинг дек, мулк қилиб олган юридик ва жисмоний шахслар ер 
участкаларига бўлган ўз ҳуқуқларини белгиланган тартибда рўйхатдан ўтка-
зишлари шарт.
Ер участкаларига бўлган ҳуқуқларни давлат рўйхатига олиш асослари.
Ер участкаларига бўлган ҳуқуқларни белгиловчи, ўзгартирувчи ёки бекор 
қилувчи ҳужжатлар ана шу ҳуқуқларни давлат рўйхатига олиш учун асос бўлиб 
хизмат қилади.
Ер участкаларига эгалик қилиш ва улардан фойдаланиш ҳуқуқлари 
туман, шаҳар, вилоят ҳокимининг, Қорақалпоғистон Республикаси Вазирлар 
Кенгашининг ҳамда Ўзбекистон Республикаси Вазирлар Маҳкамасининг ер 
ажратиш тўғрисидаги қарорлари асосида рўйхатга олинади.
Ерларни ижарага олиш ҳуқуқи ер участкасини ижарага олиш шартномаси 
асосида рўйхатга олинади.

---