Kasb-hunar maktabi

O’zbekiston Respublikasi Davlat Gerbi

O’zbekiston Respublikasining Davlat gerbi O’zbekiston Respublikasi Oliy Kengashining X sessiyasida 1992 yil 2 iyul kuni tasdiqlangan.

O’zbekiston Respublikasi Davlat gerbi gullagan vodiy uzra charaqlab turgan quyosh tasviridan hamda o’ng tomonida bug’doy boshoqlari, so’l tomonida ochilgan paxta chanoqlari surati tushirilgan chambardan iboratdir. Gerbning yuqori qismida respublika jipsligining ramzi sifatida sakkiz qirrali yulduz tasvirlangan: sakkiz qirra ichida joylashgan yarim oy va yulduz musulmonlarning qutlug’ ramzidir. Gerb markazida himmat, oliyjanoblik va fidoiylik timsoli bo’lgan afsonaviy HUMO qushi qanotlarini yozib turibdi. Ushbu ramz va timsollar xalqimizning tinchlik, yaxshilik, baxt-saodat, farovonlik yo’lidagi orzu-umidlarini ifodalaydi. Gerbning pastki qismidagi Respublika Davlat Bayrog’ini ifodalovchi uch rangdagi chambar bandiga «O’zbekiston» so’zi bitilgan.

«Gerb» so’zining tarixi haqida qisqacha ma`lumot.

«Gerb» so’zi nemischa «Erbo» so’zidan olingan bo’lib, shohlar va xukmdorlarga davlat, sarhad, hudud va boshqa nasldan-naslga meros qoluvchi mulk belgisini anglatadi.

Bundan 2500 yil muqaddam Erondan Oltoyga qadar cho’zilgan ulkan sarhadda hukm surgan turk xoni O’g’izxon davrida ham turkcha «tamg’a» so’zi aynan shu ma`noni bildirar edi. X11 asrning mashhur tarixchisi Rashiddin Hamadoniy «Tanlangan tarixlar» nomli kitobida shahodat berishicha, O’g’uzxon o’z mol-mulkini o’g’illariga ulush sifatida kichik davlatlarga bo’lib, in`om etgan. Ushbu davlatlar hukmdorlari ham o’zlarining xonlik tamg’alariga ega edi. Ko’rinib turibdiki, «Tamg’a» so’zining ma`nosi nemischa «Erbo» so’zining ma`nosiga to’la mos keladi.