Касалликлари ва зараркунандаларига қарши

Учувчи зараркунандалар ва ўргимчак канага қарши курашиш учун экишга тайёрланилган кўчатларга профилактика мақсадида 50% ли Тиодан эритиладиган порошоги (0,36-1,4 кг/га) билан ёки 50% ли Актеллик эмулсияси (3-7,5 л/га) билан ишлов берилади. Помидорларни ўз вақтида ва нормага мувофиқ суғориш хамда даврий равишда иссиқхонадаги хавони алмаштириб турган маъқул бўлади. Сўлиган, қуриган, чириётган помидор кўчатларини ўз вақтида йиғиштирш ва йўқотиш даркор, экиш учун эса фақат соғлом ва бақувватларини танлаш зарур, касалларини ва нимжонларини эса дархол бошқаларидан ажратиб йўқотиб юбориш керак.
Зараркунандаларга қарши заҳарли химикатларсиз хам уй шароитида тайёрлана оладиган, арзон ва кулай қўлбола дорилар орқали ҳам бемалол курашиш мумкин. Бунинг учун қуйидаги заҳарли дамлама ва қайнатмалардан фойдаланиш мумкин:
Пиёз пўстидан тайёрланган дамлама ўсимликлардаги сўрувчи зараркунандаларга қарши ишлатилади. Ярим пақир пиёз пўстининг устига 10 литр қайноқ сув қуйиб, дамлаб қўйилади. Уни ишлатишдан олдин сузиб олиб, яна икки баробар сув қўшилади ва ўсимликларга пуркалади.
Саримсоқ дамламаси тайёрлаш учун 200 грамм саримсоқ майдаланади ва 10 литр сувга солиб қўйилади. Бундай дамлама бодринг, қовоқ, қовун битларига ва каналарга қарши ишлатилади. Саримсоқ дамламаси кўпгина зараркунандаларнинг капалакларини чўчитади. Фитофтороз касаллиги қўзғатувчиларига қарши дамлама тайёрлаш учун 10 литр сувга 50 грамм саримсоқ қўшилади. Бундай қўлбола дори помидорга мева тугиш олдидан, картошкага эса гуллаш арафасида пуркалади.
Картошка палагидан тайёрланган дамлама битлар, карам оқ капалаги, карам тунлами ва куяси хамда каналарга қарши ишлатилади. Бу дамламани тайёрлаш учун 1,2 кг яшил ёки қуритилган картошка пояси майдаланиб, 10 литр илиқ сувга солинади ва 3 соат давомида димланиб, сўнгра сузиб олинади. Бу эритмани кечки пайтлар экинга пуркалади.