Карташунослик мавзу: карталарни лойиҳалаш, тузиш ва нашр қилиш

Чуқур нашр қилиш усули - бу усуда картани нашр қилишда, картографик тасвир нашр формасига ўйиб туширилади, яъни чуқурлаштириб жойлаштирилади. Сўнгра бу чуқурчалар ранг бўёқлари билан тўлдириб нашр қилинади. Бу усул карталарни энг юқори полиграфик сифат билан таъминлайди ва бу усулда нашр қилинган карталар сифати полиграфик жиҳатдан энг юқори, аъло баҳо билан баҳоланади.
Баланд нашрли усул - бу усулда картани нашр қилишда катографик тасвир нашр формасига бевосита бўрттириб, яъни қавартириб туширилади ва бу қавариқ жойларга ранг бўёқлари суртилади. Нашр формасининг картографик тасвирлардан бўш қолган очиқ жойларига рангларни юқтирмайдиган махсус суюқлик билан ишлов берилади. Бунинг натижасида, картани нашр этиш жараёнида ранг бўёқлари қоғозда ўз аксини топади, очиқ жойларга ранг бўёқлари юқмасдан қоғозда оқлигича қолади.
Текис нашр усули - бу усулда картани нашр этиладиган элементлари ва очиқ қоладиган жойлари нашр формасида бир текисликда, бир сатихда жойлаштирилади. Кимёвий ишлов бериш натижасида ранг бўёқлари фақат чоп этиладиган элементларгагина ёпишади, бўш қолган очиқ жойлар эса ранг бўёқларини қабул қилмайди. Текис нашр қилиш усули одатда оддий ва унча мураккаб бўлмаган карталарни чоп этиш учун қўлланилади.
Картани нашр қилиш жараёнида аввал штрихли элементлар намунаси (штриховая проба), сўнгра рангли элементлар намунаси (красочная проба) чоп этилиб, уларнинг намунаси, картографик фабрикада босилган нусхаси, яъни оттиски олинади. Олинган оттискиларни бир-бирига қўшиш ва солиштириш ёрдамида ҳар хил рангларда чоп этилган карта элементлари маъносини бир-бирига тўғри келиши ва мослиги аниқланади. Штрихли элементлардан олинган нусханинг аниқлиги ва сифати текширилади. Рангларни танланиши ва уларни контурларга мос келиши, шакллар градацияси ва отмывка, ёзувларнинг тўғри ёзилиши ва жойга мослиги кўриб чиқилади. Штрихли элементлар намунаси ва рангли элементлар намунси нашр жараёнида картани корректура қилиш ва нашр хатоликларини тўғрилаш учун ишлатилади.