К. Б. Уразов, Н. У худайбердиев, М. М. Ибрагимов, Д. К. Уразов

10.4. Бюджетга тўловлар бўйича мажбуриятларнинг ҳисоби

Бюджетга тўловлар бўйича мажбуриятлар барча солиқ ва тўловларнинг давр бошидаги кредиторлик қарзи устига ҳисобот даврида ҳисобланган солиқ ва тўловлар суммасини қўшиш, шунингдек ҳисобот даврида ўтказиб берилган бўнакларни ва камайтиришга олиб борилган суммаларни айириш орқали топилади. Ушбу сумма ҳисобот даври охирига солиқ тўловлари бўйича ҳали ўтказиб берилмаган мажбуриятни ташкил этади.

Бюджетга тўловлар бўйича корхонанинг мажбуриятлари ҳисоби қуйидаги счётларда юритилади:
*6240 "Солиқлар ва мажбурий тўловлар бўйича кечиктирилган мажбуриятлар". Ушбу счётда масъул Ҳукумат идораларининг қарори бўйича қонунчиликка мувофиқ тўланиши кечиктирилишига рухсат этилган солиқлар бўйича бюджет олдидаги қарзлар ва мажбурий тўловларнинг жорий қисми акс эттирилади. Унинг кредитида кечиктирилган жорий тўловлар суммаси бюджетга тўловлар бўйича қарзларни ҳисобга олувчи счётлар (6400) ва мақсадли давлат жамғармаларига тўловлар бўйича қарзларни ҳисобга олувчи счётлар (6520) билан боғланган ҳолда ҳисобга олинади;
*6250 "Вақтинчалик фарқлар бўйича кечиктирилган фойда солиғи бўйича мажбуриятлар". Вақтинчалик фарқлар бўйича кечиктирилган фойда солиғига доир мажбуриятларнинг тегишли жорий қисми 7250 "Вақтинчалик фарқлар бўйича кечиктирилган фойда солиғи бўйича узоқ муддатли мажбуриятлар" счётидан 6250 "Вақтинчалик фарқлар бўйича кечиктирилган фойда солиғи бўйича мажбуриятлар" счётига ўтказилади. Кейинчалик вақтинчалик фарқлар бўйича кечиктирилган фойда солиғи вужудга келишига қараб, 6250 "Вақтинчалик фарқлар бўйича кечиктирилган фойда солиғи бўйича мажбуриятлар" счёти 6410 "Бюджетга тўловлар бўйича қарзлар (турлари бўйича)" счёти билан боғланади;
*6410 "Бюджетга тўловлар бўйича қарзлар (турлари бўйича)". Ушбу счётнинг кредитида бюджетга тўланиши керак бўлган мажбурият суммаси олинадиган счётлар, давр харажатлари, солиқлар ва бошқа мажбурий тўловларни тўлаш учун фойданинг ишлатилиши, меҳнат ҳақи бўйича ходимлар билан ҳисоб-китобларни ҳисобга олувчи счётлар билан боғланган ҳолда акс эттирилади. Якуний ҳисоб-китобда, солиқлар ва бошқа мажбурий тўловлар бўйича бюджетга илгари ўтказилган бўнак тўловлари 6410 "Бюджетга тўловлар бўйича қарзлар (турлари бўйича)" счётининг дебет томонида бюджетга бўнак тўловларини ҳисобга олувчи счётлар (4400) билан боғланган ҳолда акс эттирилади. Бюджетга ҳақиқатда ўтказилган суммалар 6410 "Бюджетга тўловлар бўйича қарзлар (турлари бўйича)" счётининг дебет томонида пул маблағларини ҳисобга олувчи счётлар билан боғланган ҳолда акс эттирилади (10.4-жадвалга қаранг).
10.4-жадвал
Бюджетга тўловлар бўйича жорий мажбуриятларнинг ҳисобда акс эттирилиши