Jismoniy tarbiya va sport to‘g‘risida

Sport hakamlari va sport hakami toifalari to‘g‘risidagi
NIZOM
Mazkur Nizom O‘zbekiston Respublikasining “Jismoniy tarbiya va sport to‘g‘risida”gi Qonuni (O‘zbekiston Respublikasi Oliy Majlisining Axborotnomasi, 2000-y., 5-6-son, 147-modda) va O‘zbekiston Respublikasi Vazirlar Mahkamasining 2005-yil 5-apreldagi 96-son qarori bilan tasdiqlangan O‘zbekiston Respublikasi Madaniyat va sport ishlari vazirligi to‘g‘risidagi nizomga (O‘zbekiston Respublikasi qonun hujjatlari to‘plami, 2005-y., 14-son, 104-modda) muvofiq, sport hakamlik faoliyati va hakamlarga toifalarni berish tartibini aniqlaydi.
I. Umumiy qoidalar
1. Ushbu Nizom jismoniy tarbiya va sport sohasida faoliyat yuritib kelayotgan tashkilotlar hamda sport hakamlik faoliyatini olib borayotgan jismoniy shaxslar uchun qo‘llaniladi.
2. Sport turlari bo‘yicha faoliyatni olib borish faqat tegishli tayyorgarlikka ega bo‘lgan hakamlarga ruxsat etiladi.
3. Ushbu Nizomda quyidagi asosiy tushunchalardan foydalaniladi:
vakolatli organlar — O‘zbekiston Respublikasi Madaniyat va sport ishlari vazirligi, Qoraqalpog‘iston Respublikasi Madaniyat va sport ishlari vazirligi, viloyatlar va Toshkent shahar madaniyat va sport ishlari boshqarmalari hamda O‘zbekiston Respublikasi Mudofaaga ko‘maklashuvchi “Vatanparvar” tashkiloti Markaziy Kengashi va uning hududiy bo‘linmalari;
sport hakami — sport musobaqasi tashkilotchisi tomonidan vakil qilingan, sport turi qoidalariga hamda sport musobaqasi to‘g‘risidagi nizomga (reglamentga) rioya etilishini ta’minlaydigan, maxsus tayyorgarlikdan o‘tgan va tegishli malaka toifasini olgan jismoniy shaxs;
hakamlik toifasi — sport turi bo‘yicha hakamning malakaviy darajasi.
II. Hakamlik faoliyatining vazifalari
4. Sport turlari bo‘yicha hakamlar faoliyatining asosiy vazifalari quyidagilardan iborat:
xalqaro sport tashkilotlari qoidalari, musobaqa nizomlari (reglament) va boshqa hujjatlari asosida yuqori darajada musobaqalarni tashkil qilish va ularda hakamlik qilish;
O‘zbekiston aholisining keng qatlamlari o‘rtasida sportni ommalashtirish;
sport turlari bo‘yicha hakamlar malakasini oshirish;