"Жаҳонгир+" мчж (даъвогар) ва "Вилоят кўприклардан фойдаланиш" дук (жавобгар) ўртасида 2019 йил 10 апрелда 6-сон пудрат шартномаси тузилган

“Жаҳонгир+” МЧЖ (даъвогар) ва “Вилоят кўприклардан фойдаланиш” ДУК (жавобгар) ўртасида 2019 йил 10 апрелда 6-сон пудрат шартномаси тузилган. Унга кўра, даъвогар “Пудратчи” жавобгар (Буюртмачи) тасарруфидаги автомобиль йўлларида кўча ёриткичларини ўрнатиш ишларини бажариш, жавобгар эса бажарилган ишларни қабул қилиб олиш ва уларга ҳақ тўлаш мажбуриятини олган. Шартноманинг қиймати 500.000.000 сўмни ташкил этган. Шартномага асосан даъвогар томонидан 147.877.653 сўмлик ишлар бажарилган бўлса-да, жавобгар бажарилган ишлар учун даъвогарга қарзини тўлаб бермасдан, шартнома шартларини бузган. Натижада жавобгарнинг даъвогар олдида жами 147.877.653 сўм қарзи вужудга келган. Даъвогарнинг ушбу қарздорликни узиш тўғрисидаги талабномаси оқибатсиз қолдирилган.

Шу сабабли, даъвогар судга мурожаат қилиб, жавобгардан 147.877.653 сўм асосий қарз, 26.987.671 сўм пеня, 22.181.647 сўм жарима ҳамда олдиндан тўланган давлат божи ва почта харажатини ундиришни сўраган. Суд мажлисида иштирок этган даъвогар раҳбари даъво талабларини қувватлаб, тарафлар ўртасидаги шартнома жамият ҳисобчиларнинг айби билан йўқотилганини, нусхаси ҳам қолмаганини, бироқ шартномага асосан бажарилган ишлар жавобгар томонидан қабул қилиб олинганини, суд мажлиси кунига қадар жавобгар томонидан қарздорлик тўлаб берилмаганини маълум қилиб, даъво аризасини тўлиқ қаноатлантиришни сўрайди. Суд мажлисида қатнашган жавобгар вакили даъвони қисман тан олиб, ҳақиқатан ҳам даъвогар томонидан бажарилган ишлар қабул қилиб олинганини, бироқ қарздорликни тўлаб бериш мақсадида талаб этилган ҳужжатлар даъвогар томонидан ўз вақтида тақдим этилмагани сабабли, қарздорлик тўлаб берилмаганини, шартноманинг корхонадаги мавжуд нусхасини топиш имкони бўлмаганини маълум қилиб, ҳозирги кунда корхона иқтисодий жиҳатдан оғир аҳволда эканини инобатга олиб, талаб қилинган пеня ва жарима миқдорини камайтиришни сўраган.
Тарафлар ўртасида тузилган шартнома нусхаси суд муҳокамасида тарафлар вакилларининг “йўқотилган” деган важи билан судга тақдим этилмагани туфайли жараёнда суммалар юзасидан низо келиб чиққан.
Тўғри, суд алоҳида ҳолларда қарздор ва кредиторнинг манфаатларини ҳисобга олиб, кредиторга тўланиши лозим бўлган неустойкани камайтириш ҳуқуқига эга.
Вазиятга ҳуқуқий баҳо беришда шартноманинг йўқотилганлиги фактини ҳисобга олинг.