Ислoм каримoв нoмидаги тoшкент давлат теxника университети геoлoгия-қидирув ва кoн-металлургия факултети

2.3. Сорбцион танлаш эритиш

Нодир металларнинг цианли эритмалардан (ион алмашгич смолалар ёрдамида) сорбциясини тиндирилган эритмалардан ёки цианлаш жараёни давомида бўтананинг ўзида амалга ошириш мумкин.

Биринчи усул – рудадан олтинни одатдаги цианлаш усули билан ажратиш бўлиб, фарқи цианли эритмадан Au метал ҳолдаги рух ёрдамида эмас, балки ион алмашгич смола ёрдамида чўктирилади. Лекин ион алмашгич смоланинг нархи жуда баланд бўлгани учун у анча арзон ва яхши ўзлаштирилган усул бўлган рух ёрдамида чўктириш билан беллаша олмайди.
Иккинчи усулда – ион алмашгич смола билан тиндирилган олтинли эритма эмас, балки цианлаш жараёнидаги бўтана таъсирлашади. Нодир металлар цианли эритмада эриб, бўтананинг суюқ фазасига ўтади ва бир вақтнинг ўзида сорбентга ютилади. Бунда танлаб эритиш ва сорбция жараёнининг бирлаштирилгани учун бу жараён сорбцион танлаб эритиш дейилади.
Танлаб эритиш ва сорбция тамом бўлгандан кейин смола ажратиб олинади, олтинсизлантирилган бўтана чиқиндилар майдонига жўнатилади. Смолани бўтанадан ажратиш вақтида смоланинг ўлчами (0,5 дан 2 мм гача) янчилган руданинг ўлчамидан анча катталигига асосланилади. Бўтана кўзининг ўлчами янчилган руданикидан катта, лекин смоланинг ўлчамидан кичик бўлган элак (ғалвир) орқали ўтказилади.
Смоланинг йирик заррачалари эса эритма билан элакдан ўтиб кетади.
Олтинга тўйинган смола десорбцияланиб, қайта тикланади ва сорбцион танлаб эритишга қайтадан жўнатилади.
Сорбцион танлаб эритиш олтин ажратиш фабрикалари технологик схемасидан қўпол хамда қиммат турувчи цианлаш жараёнидан кейинги бўтанани фильтрлаш ва ювиш жараёнини чиқариб ташлайди ва бу унинг асосий афзалликларидан биридир. Иккинчи афзаллиги шундаки, у кўп холларда олтиннинг юқори ажралишини таъминлайди. Бу холат шундай тушунтириладики, цианланаётган бўтанага ионитнинг киритилиши эритмадаги олтиннинг концентрациясини кескин камайтириб юборади ва бунинг оқибатида унинг олтинли рудаларда кўпинча учрайдиган бошқа табиий сорбентларга (кўмирли моддалар, лойли минералларнинг жуда майда заррачалари) ютилишини камайтиради.
Баъзи холларда олтиннинг ажралиши 10-20 % га ортиши мумкин. Сорбцион танлаб эритишнинг яна бир муҳим афзаллиги, ионитлар иштирокида олтиннинг эриши одатдаги цианлашга нисбатан тез кетади.