Islom Karimov asarlarida ta’lim-tarbiya masalalari

Islom Karimov merosining yoshlar tarbiyasidagi o‘rni
Abdulla Qodiriy nomidagi Jizzax davlat pedagogika institutida “Islom Karimov asarlarida ta’lim-tarbiya masalalari” mavzusida respublika ilmiy-amaliy konferensiyasi bo‘lib o‘tdi.

O‘zbekiston «Milliy tiklanish» demokratik partiyasi Jizzax viloyati kengashi, O‘zbekiston Respublikasi Xalq ta’limi vazirligi va viloyat xotin-qizlar qo‘mitasi hamkorligida tashkil etilgan anjumanda yoshlarda mustaqil hayotiy pozitsiyani shakllantirishda Birinchi Prezidentimiz Islom Karimov asarlari muhim ahamiyat kasb etayotgani alohida ta’kidlandi.

“Islom Karimov asarlarida mamlakatimiz yoshlari hayotiy pozitsiyasini shakllantirish va ta’lim-tarbiya masalalari” mavzusi taniqli olimlar, yosh tadqiqotchilar tomonidan tayyorlangan ilmiy ma’ruza, maqola va tezislarda ilmiy-nazariy, amaliy va uslubiy nuqtai nazardan tahlil qilindi.

Konferensiyada Birinchi Prezidentimiz Islom Karimov nafaqat mustaqilligimiz asoschisi, balki mamlakatimiz tanlagan taraqqiyot yo‘lining rahnamosi, yirik islohotchi, barkamol avlod tarbiyasiga yangicha yondashuvning chinakam tashabbuskori sifatida xalqimiz qalbida abadiy qolishi ta’kidlandi. Islom Karimov tomonidan ilgari surilgan ilg‘or g‘oyalar, konseptual fikrlar yoshlarni ma’naviy barkamol, mustahkam va faol hayotiy pozitsiyaga ega yetuk insonlar etib tarbiyalashda muhim dasturilamal bo‘lib xizmat qilayotgani buning isbotidir.

– Bugungi globallashuv jarayonlari dunyoning g‘oyaviy-mafkuraviy qiyofasini o‘zgartirib, yangicha tafakkur uslubini taqozo qilmoqda, – deydi Islom Karimov nomidagi Toshkent davlat texnika universiteti o‘qituvchisi, filologiya fanlari doktori Baxtiyor Karimov. – Shu bois O‘zbekistonda ta’limning ijtimoiylashuvi va ilm-fanni zamon talablari bilan uyg‘unlashtirishga alohida e’tibor qaratilmoqda. Talaba-yoshlarni muayyan mutaxassislik, kasb-hunarni chuqur egallagan kadrlar etib tarbiyalash bilan birga, Vatan va xalq manfaati yo‘lida fidoyilik ko‘rsata oladigan, mustaqilligimiz mohiyati va qadrini teran anglaydigan, uni har qanday xavf-xatardan asrashni o‘zining muqaddas burchi, deb biladigan shaxslar qilib ulg‘aytirish eng muhim vazifalardan hisoblanadi. Bu vazifani amalga oshirishda Birinchi Prezidentimiz asarlarida ma’naviyat haqida bildirilgan ilmiy-metodologik fikrlar, g‘oya va tavsiyalarning ahamiyati katta.

Konferensiyada “Mamlakatimiz yoshlari hayotiy pozitsiyasini shakllantirishda Islom Karimov ma’naviy merosining o‘rni va ahamiyati”, “Mamlakatimizda demokratik islohotlarni chuqurlashtirish va fuqarolik jamiyatini rivojlantirishning yoshlar fuqarolik pozitsiyasini shakllantirishdagi o‘rni”, “Yoshlarda konstruktiv hayotiy pozitsiyani shakllantirishning ilmiy-pedagogik asoslari”, “Globallashuv sharoitida yoshlar ma’naviyatini shakllantirishning ustuvor yo‘nalishlari” mavzularida ma’ruzalar tinglandi.

– Birinchi Prezidentimiz Islom Karimov yosh avlodni ma’nan yetuk insonlar etib tarbiyalashning nafaqat moddiy-texnik tomoni, balki nazariy-metodologik, huquqiy va tashkiliy asoslarini ishlab chiqishning tashabbuskori, barkamol avlod tarbiyasini umummilliy vazifa darajasiga ko‘targan buyuk shaxs edi, – deydi Abdulla Qodiriy nomidagi Jizzax davlat pedagogika instituti o‘qituvchisi, filologiya fanlari doktori, professor Baxti Ochilova. – U kishining barcha asarlarida ma’naviyat va madaniyat muammolari bo‘yicha ilmiy asoslab berilgan qoida va xulosalar tamomila yangiligi, milliy va umuminsoniy ruhi mazmunan hamohangligi, Sharq falsafasi, islom ta’limotidagi ilg‘or g‘oyalarga asoslangani hamda mamlakatimiz istiqbolini nazarda tutgani bilan alohida ahamiyatga ega.

Anjumanda Islom Karimov asarlarini o‘rganish, targ‘ib qilish, oliy o‘quv yurtlarida o‘qitishni chuqurlashtirish yuzasidan ilmiy-uslubiy tavsiyalar qabul qilindi.