Ishsizlik nafaqasi to‘lash

O’zbekiston Respublikasi Mehnat kodeksining 100-moddasi ikkinchi qismi 1-bandiga asosan texnologiyadagi, ishlab chiqarish va mehnatni tashkil etishdagi o‘zgarishlar, xodimlar soni (shtati) yoki ish xususiyatining o‘zgarishiga olib kelgan ishlar hajmining qisqarganligi yoxud korxonaning tugatilganligi munosabati bilan xodimlarning mehnat shartnomasi bekor qilinishi mumkin.

Mehnat kodeksining 57-moddasi ikkinchi qismiga ko’ra har kim ish beruvchiga bevosita murojaat qilish yoki mehnat organlarining bepul vositachiligi orqali, shuningdek xususiy bandlik agentliklarining xizmatlari vositasida ish joyini erkin tanlash huquqiga egadir.

Shunga asosan, Siz mazkur kodeksning 59-moddasiga muvofiq O‘zbekiston Respublikasi Bandlik va mehnat munosabatlari vazirligi tizimining tegishli organlariga murojaat qilib, ularning ko’magida ishga joylashishingiz mumkin.

Shuningdek, 64-moddada ishdan mahrum bo‘lgan, birinchi marta ish qidirayotgan, shuningdek uzoq (bir yildan ortiq) tanaffusdan keyin mehnat faoliyatini qayta boshlashni istagan va ishsiz deb e’tirof etilgan shaxslarga quyidagi imtiyozlar berilishi belgilangan:

- ishsizlik nafaqasi to‘lash;

- qaramog‘idagilarni hisobga olgan holda moddiy yordam berish;

- kasb o‘rganish, malaka oshirish yoki qayta tayyorlash davrida stipendiya to‘lanishi hamda shu davrni mehnat stajiga qo‘shish;

- haq to‘lanadigan jamoat ishlarida qatnashish imkoniyati ta’minlanadi.

- Mehnat shartnomasi alohida asoslar bo‘yicha bekor qilingan taqdirda xodimlarga moddiy madad berish uchun qo‘shimcha kafolatlar beriladi (67-modda).

Bundan tashqari, vazirlikning http://ish.mehnat.uz/ sayti orqali bo’sh ish o’rinlari bo’yicha ma’lumotlar bilan mustaqil tanishib borishingiz mumkin.