Қишлоқ хўжалик фитопатологияси фанининг мақсади ва вазифалари

Бодомнинг парша касаллиги. Бу касалликни Fusicladium amygdali замбуруғи қўзғатади. Касаллик белгилари ўсимликнинг барги ва меваларида кузатилади. Касал барг юзасида оч яшил доғлар ҳосил бўлади. Кейинчалик доғ сиртида яққол кўзга ташланадиган яшил-қўнғир ғуборлар юзага келади. Бутун ёз давомида замбуруғ конидиялари орқали соғ ўсимликларга ўтади. Ўсимликнинг зарарланган аъзоларида ва барг қолдиқларида перитеций мева таналари ёрдамида қишлаб чиқади.
Пистанинг ун шудринг касаллиги. Касалликни Phyllactina suffulata замбуруғи қўзғатади. Ун шудринг билан ўсимликнинг барглари зарарланади. Баргнинг орқа томонида кўзга яққол ташланмайдиган оқ ғуборлар ҳосил бўлади. Касалликнинг кучли ривожланиши сентябрь ойларида жадал бўлади. Ёз охирида зарарланган барг сиртида оқ ғуборлар орасида аввал қизғиш, кейинчалик қорамтир-қўнғир рангдаги мева тана - клейстотецийлар юзага келади. Зарарланган барглари сарғайиб, тўкилади. Касалликни қўзғатувчи замбуруғ мева таналари ёрдамида баргларда қишлаб чиқади.
Писта поясини ўзак қисмини чириши. Fomes rimosus замбуруғи касалликни қўзғатади. Катта ёшдаги писта дарахтининг поясида замбуруғнинг мева танаси ҳосил бўлади. Ҳар йили гимениал қават ҳисобига мева тана катталашиб боради. Касаллик билан зарарланган ўсимликни поясида мева тана ҳосил бўлгунча ўзак қисмини чириганлиги кузатилади. Чунки замбуруғнинг мева танаси писта касаллик билан зарарлангандан кейин 2-3 йилдан сўнг ҳосил бўлади. Кейинчалик касал дарахт аста-секинлик билан қурийди. Замбуруғнинг мева таналарида етилган споралар атрофидаги кўплаб соғ писта дарахтларини зарарлаши мумкин. Касаллик олдини олиш чораларини яхши йўлга қўйилмаган жойларда кенг тарқалиб кетади.
Пистанинг занг касаллиги. Касалликни Pileolaria terebenthi замбуруғи қўзғатади. Занг билан барглар зарарланади. Касалликка чалинган баргларнинг устки ва остки қисмида қизғиш-қўнғир рангдаги замбуруғ уредоспоралари ҳосил бўлади. Кейинчалик уларнинг ўрнида телейтоспоралар тўпламидан иборат қўнғир ёстиқчалар юзага келади. Зарарланган барглар сарғайиб, тўкилади. Касалликни қўзғатувчи замбуруғ телейтоспоралари ёрдамида қишлаб чиқади.