Konstruksiyada armaturaning qo‘llanilishi
Taranglashtirilmaydigan armatura sifatida – At–III, A–III sinfli sterjenli armaturalar va Vr–I sinfli oddiy simlar ishlatiladi. Montaj armatura sifatida hamda to‘qilgan sinchlarning xomutlari sifatida A–I, Vr–I sinfli armaturalar qo‘llaniladi.
Taranglashtiriladigan armatura sifatida qizdirish yo‘li bilan (termik usul) mustahkamlangan – At–IVS, At–V, At–VI sinfli armaturalar hamda A–IV, A–V va A–VI sinfli armaturalarni qo‘llash tavsiya etiladi; 12 m dan uzun bo‘lgan elementlar uchun arqon armaturalar, yuqori mustahkamlikka ega bo‘lgan simlar Vr–II hamda – A–IV, A–V, A–VI sinfli sterjenli armaturalarni qo‘llash tavsiya etiladi.
Konstruksiyalarda qo‘llash uchun po‘latli armaturani tanlashda uning payvandlanish xususiyati hisobga olinadi. A–I, A–II, A–III, A–IV, A–V, A– VI, At–IIIC va At–IVC sinfli sterjenli armaturalar va oddiy simlar to‘rlarni tayyorlashda kontak–payvand usulida yaxshi payvandlanadi.
Mustahkamligi termik usulda oshirilgan At–V, At–VI sinfli sterjenli armaturalarni va yuqori mustahkamli simlarni payvandlash mumkin emas, chunki mustahkamlash samaradorligi yo‘qoladi.
Payvandlangan armatura mahsulotlari
Payvandlanadigan armaturali to‘rlar va sinchlar asosan korxonalarda tayyorlanadi. Sinchlar va to‘rlarning ko‘ndalang va bo‘ylama sterjenlari, asosan, to‘g‘ri burchak ostida nuqtali kontakt usuli bilan elektr – payvandlovchi mashinalarda payvandlanadi. To‘r va sinchlarni payvandlash mashinasida tayyorlash armatura ishlarini industriyalashtirish, mehnat unumdorligini oshirish va armatura tayyorlash ishlarini arzonlashtirish imkonini beradi. Payvandlangan to‘rlar diametri 3–5 mm bo‘lgan oddiy sim va sinfi A–III bo‘lgan diametri 6–10 mm dan iborat bo‘lgan armatura sterjenlaridan standart bo‘yicha tayyorlanadi. To‘rlar rulon va yassi holatda bo‘ladi (1.14–rasm). Rulonli to‘rlarda bo‘ylama sterjenlarning eng katta diametri 6 mm qabul qilinadi. To‘rlarda ishchi armatura bo‘ylama yoki ko‘ndalang joylashishi
mumkin. Ishchi sterjenlarga perpendikulyar joylashgan sterjenlar taqsimlovchi armatura deyiladi. Bir vaqtning o‘zida to‘rning ikkala yo‘nalishda joylashgan sterjenlari ishchi sterjen bo‘lishi mumkin. To‘rning eni 3800 mm, uzunligi esa loyiha bo‘yicha qabul qilinib, 9000 mm dan oshmasligi kerak. Rulon to‘rning og‘irligi 900–1300 kg dan oshmasligi kerak.
Payvandlangan sinchlar bir yoki ikkita bo‘ylama ishchi sterjenlar, montaj sterjenlari va ularga ko‘ndalang bo‘lgan sterjenlar yordamida tayyorlanadi (1.14–rasm, a). Bo‘ylama va ko‘ndalang sterjenlarning to‘rdan chiqarib qoldiriladigan uchlarining uzunliklari 0,5d1+d2 yoki 0,5d2+d1 va
20 mm dan kam bo‘lmasligi kerak. Fazoviy sinchlar yassi sinchlardan tashkil topib bir biri bilan biriktiruvchi sterjenlar orqali payvandlab tayyorlanadi. (1.14–rasm, b).
To‘r va sinchlarni tayyorlashdagi payvandlash sifati payvandlanayotgan ko‘ndalang va bo‘ylama sterjenlarning diametri orasidagi nisbatga d1/d2 bog‘liq va 1/3…1/4 dan kam bo‘lmasligi kerak. Payvandlanadigan sterjenlar o‘qlari orasidagi masofaning eng kam miqdori ham sterjenlar diametriga bog‘liq.
Do'stlaringiz bilan baham: |