«ишлаб чиқариш инфратузилмаси» фанидан маърузалар матни

5. Ўзбекистонда логистика марказлари.
Бугунги кунда Ўзбекистонда учта логистика марказлари ташкил этилган ва фаолият кўрсатиб келмоқда:
1. Навоий шаҳар аэропорти базасида халқаро интермодал логистика Маркази.
2. “Ангрен логистика маркази” ёпиқ акциядорлик жамияти.
3. Наманган вилоятидаги “Поп логистика маркази” унитар корхонаси.
Навоий шаҳар аэропорти базасида халқаро интермодал логистика Маркази Ўзбекистон Республикаси Президентининг 2008 йил 31 декабрдаги ПҚ-1027 сонли “Навоий шаҳар аэропорти базасида халқаро интермодал логистика марказини ташкил этиш чоралари тўғрисида”ги қарорига асосан республика транспорт-транзит инфратузилмасини янада ривожлантириш ва Навоий эркин индустриал иқтисодий зонага логистика хизматларини кўрсатиш мақсадида “Ўзбекистон ҳаво йўллари” Миллий авиакомпанияси таркибида ташкил этилган. Унга мувофиқ, Навоий халқаро аэропорти “Кореан Эйр” авиакомпанияси бошқарувига 31 декабрь 2014 йилгача топширилган; Интермодал логистика марказини барпо этиш мақсадида импорт қилинадиган товар жиҳозлар божхона тўловидан озод қилинган; “Кореан Эйр” авиакомпанияси ва унинг персонали даромад (фойда) солиғи тўлашдан озод қилинган.
“Ангрен логистика маркази” ёпиқ акциядорлик жамияти 2009 йилнинг ўрталарида “Ўзавтосаноат” ДАК, “Ўзбекистон темир йўллари” ДАТК, “Ўзбекнефтегаз” МХК, “Ўзкимёсаноат” ДАК, “Ўзқурилишматериаллари” АК ва Озиқ-овқат ва ёғ-мой саноат Уюшмаси каби таъсисчилар томонидан турли категориядаги юкларни қабул қилиш ва қайта ишлар, шунингдек уларни Фарғона водийсига автомобиль транспорти орқали етказиш мақсадида ташкил этилган. Кейинчалик, Ўз.Р. ВМ нинг 2012 йил 8 майдаги 128-сонли ва 31 майдаги қарорлари асосида Ангрен логистика марказининг самарали фаолият кўрсатишини таъминлаш ҳамда унинг моддий-техник базасини янада мустаҳкамлаш чора-тадбирлари белгиланган. Ҳозирда транзит-юк терминали 8,6 га майдонни эгаллайди ҳамда омборхоналар, темир йўллар ва бошқа иншоотлар билан жиҳозланган.
“Поп логистика маркази” унитар корхонаси Ўзбекистон Республикаси Вазирлар Маҳкамасининг 2014 йил 26 февралдаги 56-сонли “Наманган вилоятида мультимодал логистика марказини ва унинг фаолиятини ташкил этиш тўғрисида”ги қарорига асосан Фарғона водийсининг транспорт-логистика инфратузилмасини замонавий талабларга мувофиқ такомиллаштириш, тадбиркорлик фаолияти субъектлари ўртасидаги кооперация алоқаларини янада кенгайтириш, юк ташиш ҳажмларини кўпайтириш, юкларни ўз вақтида ва узлуксиз етказиб бериш учун қулай шарт-шароитлар яратиш, шунингдек минтақанинг темир йўл инфратузилмасидан самарали фойдаланиш мақсадида “Ўзбекистон темир йўллари” ДАТК таркибида ташкил этилган. Мазкур қарорга мувофиқ, Поп логистика марказида юкларни ишлаш ҳажмларини йилига 4 млн. тоннагача етказиш белгиланди; транспортнинг ҳар хил турлари билан ташишнинг ўзаро боғлиқ жараёнини, шу жумладан “Қамчиқ” довони орқали юкларни ташиш учун “Ангрен логистика маркази” ЁАЖ нинг автотранспорт воситалари паркидан самарали фойдаланиш асосида ташкил этиш белгиланди; Фарғона минтақавий темир йўл боғланмасининг ихтисослаштирилган станцияларидан фойдаланиб, Ангрен логистика маркази ЁАЖ билан ўзаро тўлиқ боғлиқ ҳолда Фарғона водийси ҳудудида юкларни етказиб беришнинг ягона мультимодал схемасини таъминлаш белгиланди; Логистика марказини қуриш доирасида четдан олиб келинадиган товарлар божхона тўловидан, бажариладиган ишлар қўшилган қиймат солиғидан 2014 йил 1 январгача озод қилинди.