Isajon Sulton hayoti. Isajon Sulton ijodi

Reja:

1. 
   Isajon Sulton hayoti.
   
2. 
   Isajon Sulton ijodi.
   
3. 
   “Ozod” romani haqida.
   

Isajon Sulton (Sultonov Isajon Abduraimovich) 1967 yil 7 aprel kuni Farg‘ona viloyati, Rishton tumani, Avazboy qishlog‘ida tug‘ilgan — yozuvchi.
Toshkent davlat universitetining jurnalistika fakultetini tamomlagan. Ilk kitobi «Molba» 1990 yil nashr etilgan. 1997 yil O‘zbekiston Yozuvchilar uyushmasiga qabul qilinadi. Isajon Sultonning hikoyalari har xil badiiy-adabiy nashrlarda chop etiladi, jumladan, «Sharq Yulduzi», «Xalqlar do‘stligi» (Rossiya), «Rus dalasi» (Moldaviya), «Leksikon» (AQSH), «Kurgan Edebiyat» (Turkiya) va boshqalar. 2010 yil O‘zbekiston Yozuvchilar uyushmasining badiiy-adabiy jurnali “Sharq Yulduzi” nashriyoti tomonidan «Boqiy darbadar» romani chop etiladi. “Ozod” romani esa O‘zbekiston Yozuvchilar uyushmasi mukofotiga sazovor bo‘lgan (2012). «Oydin buloq» va «Kosa tagida nim kosa » hikoyalari “XX asr o‘zbek hikoyalari”dan joy olgan. «Munojot» (1990), «Boqiy darbadar» (2010), “Ozod” (2012), “Bog‘i Eram” (2015) kitoblari chop etilgan.
Toshkentda istiqomat qiladi.
Isajon Sulton jurnalist bilan suhbatda o`zi haqida quyidagilarni gapirib o`tadi:
-Isajon aka, suhbatimizni an’anaviy savol bilan boshlasak, ijodga kirib kelishingiz, ilk mashqlaringiz haqida ozroq so‘zlab bersangiz.
-Ijodga onam qiziqish uyg‘otgan. Farg‘onaning Rishtonida, Avazboy degan kichkina qishloqda tug‘ilib-o‘sganman. Tig‘iz bog‘lari, kishilarining siymolari haligacha ko‘z o‘ngimda. Onamning mahallasi Quyi Avazboy, u Yuqori Avazboyga kelin bo‘lib tushgan. Butun hayotini bolalariga bag‘ishlab yuborgan bu mushfiq zot haqida qancha gapirsam oz. Kishilar to‘ng‘ich farzandiga juda katta umid bog‘lashadi. Onaizor ham adabiyotga shoyon qiziqqani bois, o‘g‘lining adib bo‘lib yetishishini orzulagan bo‘lsa ne ajab… Xullas, o‘n-o‘n bir yoshda bo‘lsam kerak, ikkovlon “Toshkelinchak” degan hikoya yozganmiz. Hozir o‘ylanib qolaman, u mahallar o‘zimda bir nimaga iste’dod bormi-yo‘qmi farqlayolmas, o‘yin-kulgiga qiziqqan paytlarimiz edi. Onaizor “Shu bolamda bir nima bor-ov” deb o‘ylaganmi, ishqilib, meni badiiy ijodga yo‘naltirgan.