«iqtisodiyot nazariyasi» fanidan

TDIU sanoat iqtisodiyoti kafedrasi professori, i.f.n. B.T.Salimov

TDPU Ijtimoiy iqtisodiy fanlar kafedrasi dotsenti, i.f.n. O.Sh.Ismailov

TUZUVCHILAR: dotsent X.T.Jumanov,

katta o‘qituvchilar: G.T.Ibragimova, N.X.Isaeva.

Nizomiy nomidagi davlat pedagogika universiteti o‘quv-uslubiy kengashning

2018 yil 1-iyundagi 10 -sonli qarori bilan nashrga tavsiya etilgan

KIRISH

Hozirgi globallashuv va shiddatli integratsiyalashuv davrida kishilik jamiyati rivojlanib borgan sari uning asosi bo‘lgan ijtimoiy ishlab chiqarish ham tez o‘smoqda. Natijada ilm – fanga, jumladan iqtisodiy fanlarga qo‘yiladigan talablar ham shunga mos ravishda o‘zgarmoqda. Kuchayib borayotgan raqobatlashuv muhiti sharoitlarida har qanday fanni chuqur, atroflicha o‘rganish zaruriyatga aylanib qoldi. O‘zbekiston Respublikasi Prezidenti Sh.M.Mirziyoyev tashabbusi bilan ishlab chiqilgan O‘zbekiston Respublikasini ijtimoiy iqtisodiy rivojlantirishning ustuvor yo‘nalishlari Harakatlar strategiyasida ilgari surilgan mamlakatimizni o‘rta muddatli dasturlar asosida tezkor rivojlantirish borasidagi chora-tadbirlarni talaba yoshlar ongiga singdirish dolzarb masala sanaladi. Shu maqsadda “Iqtisodiyot nazariyasi” fanini o‘rganishda ham yangicha, ya’ni yangi pedtexnologiyalar asosida dars o‘tish bilan birga, mustaqil ravishda talabalar tomonidan fanni o‘rganish muhim ahamiyat kasb etmoqda. Bu ikki yo‘nalish bir – birini uzviy to‘ldirib borishi o‘quv jarayonini samarali tashkil etishga imkon beradi. Shuni nazarda tutib, “Ijtimoiy iqtisodiy fanlar” kafedrasi tomonidan mustaqil ishlarni yo‘lga qo‘yish uchun yangicha bir yondashuv tadbiq etilayapti. Har bir talaba “Iqtisodiyot nazariyasi” fanini o‘rganishda alohida bir variant asosida izlanishlar olib boradi. Bunda talabalar mustaqil ilmiy manbalar asosida individual ilmiy tahlil va xulosalar olish ta’minlanadi. Variantda o‘nta topshiriq bo‘lib, talaba ularni mustaqil ishlab beradi. Bajarilgan ish joriy va oraliq nazoratlar o‘tkazilgan vaqtda ko‘rib chiqiladi va baholanadi. Mustaqil ish qiziqarli ravishda bo‘lishi uchun havola etilayotgan topshiriqlar har xil – unda Prezident asarlarini, qonunlarni o‘rganish, o‘z fikrini bayon etish, klaster va taqdimotlar, mavzular bo‘yicha glossariylar tuzish, nazariyani amaliyot bilan bog‘lash uchun hisoblash ishlari va hokazolar berilgan.

Fandan havola etilayotgan mazkur mustaqil ishlarni yo‘lga qo‘yishdan asosiy maqsad “Iqtisodiyot nazariyasi” fanini chuqurroq o‘zlashtirishdir. Ayni vaqtda ushbu mustaqil ishlar majmui quyidagi vazifalarni ham hal etishga imkon beradi:

- auditoriya mashg‘ulotlarida to‘la ko‘rib chiqishga ulgurilmagan masalalarni kengroq o‘rganish;

- eng yangi ma’lumotlar bilan ish ko‘rish;

- o‘z fikr – xulosalarini kengroq bayon etish;

- amaliy ko‘nikmalarga ega bo‘lish;

- ilmiy izlanishlar asoslarini o‘rganish;

- ustoz – shogird aloqalarini yanada kuchaytirish va h.z.

Umid qilamizki, uquv jarayonini tashkil etishning bu yo‘nalishi o‘z o‘rniga ega bo‘lib qoladi.