Inson qadrini ulug‘lash – eng oliy saodat

MAHALLA-VATAN ICHRA KICHIK VATAN!
Oʻzi tugʻilib oʻsgan joy inson uchun Vatan hisoblanadi. Mahalla esa Vatan ichra kichik Vatandir. Uning obodligi, goʻzalligi va koʻrkamligi uchun jon koyitish har bir kishining muqaddas burchi hisoblanadi. Gohida baʼzi odamlarning oʻzi yashab turgan mahalladagi ahvoldan ranjib gapirganini eshitib qolaman. Aslida nolish kerak emas, shu mahallaga oʻzim nima hissa qoʻshdim, deb oʻylab koʻrishi kerak. Agar mahallada hamjihatlik boʻlsa, obodlik va koʻrkamlikka hissa qoʻshuvchilar safi koʻpaysa, albatta, gʻururlanishga arzirli maskanga aylanadi.
24-mart kuni “Obod qishloq” va “Obod mahalla” dasturlari doirasida joriy yilda amalga oshiriladigan ishlar muhokamasi yuzasidan oʻtkazilgan videoselektor yigʻilishida davlatimiz rahbari mahallalarni obodligi uchun davlat tomonidan katta gʻamxoʻrliklar qilinayotgani haqida aytib oʻtdi. Xususan, Prezidentimiz bugungi kunda yurtimizda sharoiti ogʻir boʻlgan 796 ta qishloq va shaharlarda 188 ta mahalla mavjudligini, 4 mingdan ziyod mahallaning elektr taʼminoti qoniqarsiz ahvoldaligini taʼkidlab, qishloqlarga infratuzilma borsagina, hayot sifati oʻzgarishi, tadbirkorlik rivojlanishini bildirdi.
Davlatimiz tomonidan mahallalarni rivojlantirish boʻyicha tegishli dasturlar doirasidagi ishlarga jami 21 trillion soʻm yoʻnaltirilishi maʼlum qilindi. Ogʻir inqirozdan chiqqan yilimiz, tashqi qarz jalb etmasdan, shuncha mablagʻ ajratyapmiz. Bunaqa imkoniyat Oʻzbekiston tarixida boʻlmagan. Lekin bu pulni loyiha bilan, halol-pok ishlatib, elga munosib sharoit yaratish lozimligini Prezidentimiz alohida taʼkidladi.
Shuningdek, mahallardagi infratuzilmani rivojlantirishda mahalliy Kengashlarning oʻrni va roli ham belgilab berildi. Xususan, endilikda “Obod qishloq” va “Obod mahalla” dasturlariga qaysi mahalla yoki qishloq kirishini mahalliy kengashlar belgilab beradi. Tuman va shahar hokimining iqtisod, qurilish va mahalla masalalari boʻyicha oʻrinbosarlari zarur mablagʻlar va amalga oshiriladigan ishlarni aniq hisob-kitob qilib, mahalla raisi bilan birga, hududiy kengashlarda himoya qiladi. Mahalliy kengashlar har bir mahalla kesimida ijtimoiy soha, ichimlik suvi, yoʻl-transport va infratuzilma obyektlari manzilli dasturini tasdiqlaydi. Qurilish vazirligi hokimliklar bilan birga ularning loyiha-smeta hujjatlarini ishlab chiqishga masʼul boʻladi.
Maqsad Vatan ichra Vatan hisoblangan mahallarning gullab-yashnashi, obod va goʻzal qiyofa kasb etishiga erishish ekan, bunda Oliy Majlis Qonunchilik palatasi va mahalliy Kengash deputatlari oʻzlarini burchli ekanini doim his qilgan holda ish olib borishlari lozim. Zero, yurt ertasi, istiqboli va taraqqiyoti mahallalar obodligi hamda goʻzalligi bilan chambarchas bogʻliqdir.