Informatika va programmalash

Tahrir (Edit) opsiyasi. Muhitning tahrir holatida ekanligini-tahrir oynasining ichida lipillab turuvchi kursorning mavjudligi bildiradi. Tahrir oynasining eni 249 belgi o‘lchamida (TP kompilatori faqat 126 belgini qabul qiladi). Bo‘yiga esa yetarlicha katta qog‘oz varag‘iga o‘xshatish mumkin. Tahrir qilinayotgan matn hajmi 64535 belgi bilan aniqlanadi (keyingi bosqichlarda bu chegara ancha kengaygan). Ayni bir vaqtda oynasida matnning bir qismigina ko‘rinadi va u tahrir sahifasi deb ataladi. Tahrir oynasidagi kursorni boshqarish tugmalari orqali matnning ixtiyoriy joyiga o‘tishimiz mumkin. Kursor turgan joy ekranga chiqayotgan navbatdagi belgining o‘rnini bildiradi. Kursorni boshqarish tugmalari orqali kursorni ekran bo‘ylab xarakatlantirishimiz mumkin. Agar kursor oyna chegarasiga yetib qolsa, oyna matn bo‘yicha bir satr yoki bir belgiga suriladi. Matn satrlari bir-biridan maxsus belgi bilan ajratiladi (satr oxiri belgisi). Bu belgi ekranda ko‘rinmaydi va kursor satrning ixtiyoriy joyida turganda "Enter" ni bosganda paydo bo‘ladi (bu amaldan satrni ikkiga bo‘lishda foydalanish mumkin). Ajratuvchi belgini "Del" tugmasini bosish orqali o‘chirish mumkin. Bunda kursor satr keyingi satr bilan ulanadi (agar u satr mavjud bo‘lsa). Matn tahririning ikkita ish holati mavjud bo‘lib, bu Insert (oraga qo‘yish) holati va Insert o‘chirilgan holat. Insert holati tahrir rejimi uchun normal holat hisoblanadi va tahrir oynasining birinchi satrida Insert so‘zining mavjudligi Insert holatini anglatadi. "Ins" tugmasini bosish orqali Insert holatiga o‘tish va chiqish (o‘chirish) mumkin. Insert holatida kiritilayotgan har bir belgi matni "suradi". Agar kursor satr oxirida bo‘lmasa, belgi kiritilayotganda kursorning o‘ng tomonidagi belgilar bir o‘rin o‘ngga suriladi va kiritilayotgan belgi kursor turgan joyda paydo bo‘ladi. Xuddi shunday, yangi satr kiritilayotganda ham pastdagi satrlar bir o‘rin pastga suriladi. Insert o‘chirilgan holatda, kiritilayotgan belgilar "eski" belgilar ustida (o‘rnida) paydo bo‘ladi.