Informatika va at

Standart modullar. Foydalanuvchi yaratadigan modullardan tashqari TP standart modullarga ega. Bular System, Dos, Printer, Graph, Overlay va boshqa modullar. Bu modullar Turbo.tpl faylida saqlanadi. System moduli barcha programmalarga avtomatik ravishda qo‘shiladi.

CRT moduli. CRT abbreviaturasi "Elektron nur trubkasi" mazmunini bildiradi. Haqiqatan ham, CRT modulida matn ma’lumotni ekranga chiqarish, ekran darchalarini boshqarish, ekrandagi belgilarni va kursorni boshqarishning maxsus protsedura va funksiyalari aniqlangan. Bu moduldagi protsedura va funksiyalar kodi uncha katta bo‘lmasdan-3 Kb tashkil qiladi va u TURBO.TPL-sistemaviy kutubxona tarkibiga kiradi.

Quyida CRT moduliga kiruvchi asosiy protsedura va funksiyalarni keltiramiz:

Window(X1,Y1,X2,Y2:byte)-ekranda joriy darchani aniqlash. Window protsedurasi bajarilgandan keyin ekran ustida bajariladigan barcha amallar ekranning X1, Y1, X2, Y2 koordinatalari bilan berilgan qismiga taalluqli bo‘ladi. Satr va ustunlar hisobi (kursorni joylashtirish uchun) yangi joriy darcha koordinatasiga nisbatan aniqlanadi va (1,1) koordinatali yangi darchaning chap yuqori burchagini ko‘rsatadi. Ekranning darchadan tashqari qismi programmaning ta’sir doirasidan tashqarida bo‘ladi.

Shuni ta’kidlash kerakki, Window protsedurasi chaqirilganda koordinatalar "absolut" qiymatida, ya’ni ekranning real koordinatalari bo‘yicha beriladi (oxirgi matn darchasi koordinatasi bo‘yicha emas).