Ijtimoiy-madaniy masalalar / Mehnat. Aholining bandligi]

74-modda. Kasbiy malaka va bilimlarni rivojlantirish milliy tizimining asosiy vazifalari
Kasbiy malaka va bilimlarni rivojlantirish milliy tizimining asosiy vazifalari quyidagilardan iborat:
band bo‘lmagan aholini kasbga tayyorlashni, qayta tayyorlashni va ularning malakasini oshirishni tashkil etish;
kasbga o‘qitishga doir davlat buyurtmasini shakllantirish va joylashtirish;
malakani baholash markazlari faoliyatini tashkil etish;
O‘zbekiston Respublikasi Bandlikka ko‘maklashish davlat jamg‘armasining mablag‘lari hisobidan ish qidirayotgan shaxslarning va ishsiz shaxslarning kasbiy malakasini baholash hamda tasdiqlash;
malakani baholash markazlari tomonidan malaka pasporti berilishini ta’minlash;
Tasdiqlangan malakaga ega bo‘lgan shaxslarning milliy reyestrini yaratish va uning amal qilishini ta’minlash;
band bo‘lmagan aholi o‘rtasida malakani tasdiqlashning foydasi va afzalliklarini tushuntirish.
75-modda. Kasbiy malaka va bilimlarni rivojlantirish milliy tizimining ishtirokchilari
O‘zbekiston Respublikasi Bandlik va mehnat munosabatlari vazirligi Kasbiy malaka va bilimlarni rivojlantirish milliy tizimining ishini muvofiqlashtirishni amalga oshiradi.
Kasbiy malaka va bilimlarni rivojlantirish milliy tizimining ishtirokchilari quyidagilardan iborat:
O‘zbekiston Respublikasi Bandlik va mehnat munosabatlari vazirligi huzuridagi Kasbiy malaka va bilimlarni rivojlantirish bo‘yicha respublika kengashi;
tegishli vazirliklar, davlat qo‘mitalari va idoralari, birlashmalar, kompaniyalar va tashkilotlar tomonidan tuziladigan kasbiy malaka va bilimlarni rivojlantirish bo‘yicha tarmoq kengashlari;
ishchi kasblarni rivojlantirish va ommalashtirish assotsiatsiyasi;
kasbga o‘qitish markazlari;
malakani baholash markazlari;
ish beruvchilar;
xodimlar va kasbiy malakasi, bilimi va ko‘nikmalarini baholashdan o‘tishni xohlovchi shaxslar.
Kasbiy malaka va bilimlarni rivojlantirish milliy tizimida ishtirok etish ixtiyoriydir.