Ijtimoiy-madaniy masalalar / Mehnat. Aholining bandligi]

7-bob. Ish qidirayotgan shaxslarni ishga joylashtirish
31-modda. Ish qidirayotgan shaxslarni ishga joylashtirish shartlari
Mahalliy mehnat organlarida ish qidirayotgan shaxslar sifatida ro‘yxatga olingan shaxslarni ishga joylashtirish mahalliy mehnat organlari tomonidan ushbu Qonunning 32 va 34-moddalarida nazarda tutilgan tartibda amalga oshiriladi.
Alohida hollarda, ish qidirayotgan shaxslarni ishga joylashtirish boshqa tumanlar (shaharlar) hududida joylashgan tashkilotlarda, agar ushbu tashkilotlar transport qulayligi doirasida joylashgan bo‘lsa, amalga oshirilishi mumkin.
Maqbul keladigan ishga doir taklifning soni, davriyligi va muddatlari hamda ish qidirayotgan shaxsga ishga joylashish uchun yo‘llanmalar berish cheklanmaydi.
Mahalliy mehnat organi ish qidirayotgan shaxsga bo‘sh (vakant) ish o‘rinlari ko‘payishiga qarab, u ishga joylashguniga yoki hisobdan chiqarilguniga qadar maqbul keladigan ishni taklif etishi shart.
32-modda. Ish qidirayotgan shaxslarga ishga joylashtirishga doir yo‘llanma va ishga joylashishga ko‘maklashish yuzasidan murojaatnoma berish tartibi
Bo‘sh (vakant) ish o‘rinlari va ish qidirayotgan shaxsning maqbul keladigan ishga joylashtirish to‘g‘risidagi taklifga roziligi mavjud bo‘lgan taqdirda, mahalliy mehnat organi xodimi unga:
davlat tashkilotlariga, davlat ulushi ellik foiz va undan yuqori bo‘lgan tashkilotlarga, shuningdek mulkchilikning nodavlat shakliga ega tashkilotlarga, tadbirkorlik subyektlariga zaxiraga qo‘yiladigan ish o‘rinlariga — ishga joylashtirishga doir yo‘llanma;
mulkchilikning nodavlat shakliga ega tashkilotlarga, tadbirkorlik subyektlariga — ishga joylashishga ko‘maklashish yuzasidan murojaatnoma beradi.
Ishga joylashtirishga doir yo‘llanma va ishga joylashishga ko‘maklashish yuzasidan murojaatnoma, qoida tariqasida, mahalliy mehnat organining direktori yoki direktor o‘rinbosari tomonidan yohud kompleks ijtimoiy-iqtisodiy rivojlantirish bo‘yicha sektorga biriktirilgan xodim tomonidan imzolanadi.
Ishga joylashtirishga doir yo‘llanma va ishga joylashishga ko‘maklashish yuzasidan murojaatnoma ish beruvchiga elektron tarzda, elektron raqamli imzodan foydalangan holda, shuningdek “Bandlik xizmati” axborot tizimi orqali yuborilishi mumkin.