Ijtimoiy-madaniy masalalar / Mehnat. Aholining bandligi]

26-modda. Ish qidirayotgan shaxslarga va ishsiz shaxslarga xizmatlar ko‘rsatuvchi mahalliy mehnat organlari xodimlarining huquq va majburiyatlari
Ish qidirayotgan shaxslarga va ishsiz shaxslarga xizmatlar ko‘rsatuvchi mahalliy mehnat organi xodimlari quyidagi huquqlarga ega:
ish qidirayotgan shaxslardan va ishsiz shaxslardan ularning avvalgi mehnat faoliyatiga, ma’lumotiga, oilaviy ahvoliga, daromadlari (yashash uchun mablag‘lari) manbalariga taalluqli ma’lumotlarni hamda mahalliy mehnat organining ushbu shaxslarga nisbatan qabul qilinadigan qaroriga ta’sir ko‘rsatishi mumkin bo‘lgan boshqa ma’lumotlarni so‘rab olish;
ish qidirayotgan shaxs va ishsiz shaxs tomonidan taqdim etilgan, ishsizlik nafaqasini tayinlash va to‘lashga ta’sir ko‘rsatishi mumkin bo‘lgan ma’lumotlarning to‘g‘riligi hamda ishonchliligini tekshirish;
o‘z vakolati doirasida mulkchilik shaklidan qat’i nazar tashkilotlardan, shuningdek fuqarolarning o‘zini o‘zi boshqarish organlaridan ishsizlik nafaqasini oluvchi shaxslarga taalluqli ma’lumotlarni so‘rab olish;
ish qidirayotgan shaxsning va ishsiz shaxsning roziligi bilan uning uy xo‘jaligiga band bo‘lmagan aholini hisobga olish maqsadida tashrif buyurish.
Ish qidirayotgan shaxslarga va ishsiz shaxslarga xizmatlar ko‘rsatuvchi mahalliy mehnat organining xodimlari:
ish qidirayotgan shaxslarni va ishsiz shaxslarni tezroq ishga joylashtirish, shuningdek ularning ijtimoiy himoyalanganligini ta’minlash uchun barcha sa’y-harakatlarni ishga solishi;
maslahat olish uchun mehnat organlariga murojaat etgan shaxslarni ro‘yxatga olishni amalga oshirishi, “Bandlik xizmati” axborot tizimining zarur ro‘yxatga olish hamda hisobga olish bo‘limlarini, shuningdek so‘rovnomani o‘z vaqtida va to‘g‘ri to‘ldirishi;
shaxsga doir ma’lumotlarning va maslahat jarayonida olingan ma’lumotlarning maxfiyligini ta’minlashi, ulardan faqat xizmat maqsadlarida foydalanishi;
ish qidirayotgan shaxslar va ishsiz shaxslar bilan belgilangan tartibda muntazam uchrashuvlar (muloqotlar) o‘tkazishi shart.