Ijtimoiy-madaniy masalalar / Mehnat. Aholining bandligi]

11-modda. Davlat boshqaruvi organlarining aholi bandligi sohasidagi vakolatlari
Davlat boshqaruvi organlari:
mehnat bozorini rivojlantirishni, aholi bandligini ta’minlaydigan tuzilmaviy, moliyaviy, kredit, investitsiyaga oid va soliq siyosatini amalga oshirishga doir chora-tadbirlarni ishlab chiqadi;
mehnat bozori va aholi bandligiga oid tahliliy tadqiqotlarni, prognozlashni, bu sohadagi davlat statistika hisobini va hisobotini amalga oshiradi;
aholi bandligi sohasidagi tarmoq dasturlarini, yangi ishlab chiqarish quvvatlarini va ish o‘rinlarini tashkil etish bo‘yicha investitsiya loyihalarini ishlab chiqadi hamda amalga oshiradi;
tegishli davlat kafolatlarini, shuningdek fuqarolarning aholi bandligi sohasidagi huquqlari va qonuniy manfaatlarining himoya qilinishini ta’minlaydi;
qo‘shimcha ish o‘rinlari tashkil etilishiga, mehnat sharoitlari yaxshilanishiga ko‘maklashadi;
belgilangan tartibda kasbiy standartlarni va malaka talablarini ishlab chiqadi hamda keyinchalik ro‘yxatdan o‘tkazish uchun kiritadi.
Oldingi tahrirga qarang.
Davlat boshqaruvi organlari qonunchilikka muvofiq boshqa vakolatlarni ham amalga oshirishi mumkin.
(11-moddaning ikkinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)
12-modda. Mahalliy ijro hokimiyati organlarining aholi bandligi sohasidagi vakolatlari
Mahalliy ijro hokimiyati organlari:
tegishli hududda aholi bandligi sohasidagi davlat siyosatining asosiy yo‘nalishlarini amalga oshiradi;
aholi bandligiga ko‘maklashishga doir hududiy dasturlarni, yangi ishlab chiqarish quvvatlarini va ish o‘rinlarini tashkil etishga doir hududiy investitsiya loyihalarini ishlab chiqadi hamda ularning bajarilishini ta’minlaydi;
ish o‘rinlari tashkil etilishini va aholi bandligining o‘sishini rag‘batlantirish, ishsizlik darajasini kamaytirish, aholining ijtimoiy ehtiyojmand toifalarini ishga joylashtirish bo‘yicha chora-tadbirlarni amalga oshiradi;
aholi bandligiga ko‘maklashishga doir dasturlar prognoz parametrlarining bajarilishini ta’minlaydi;
yangi ish o‘rinlari tashkil etilishini rag‘batlantirish bo‘yicha hududiy jamg‘armalar faoliyatini boshqarishni amalga oshiradi, shu jumladan tadbirkorlik subyektlarini qo‘llab-quvvatlash uchun tijorat banklarida kredit liniyalarini ochish choralarini ko‘radi;
aholining ijtimoiy ehtiyojmand toifalarini ishga joylashtirish uchun davlat-xususiy sheriklik shartlari asosida tashkilotlarni tashkil etadi;
Oldingi tahrirga qarang.
oilaviy tadbirkorlikni, hunarmandchilikni, tomorqa xo‘jaliklaridagi qishloq xo‘jaligi ishlab chiqarishlarini, kasanachilikni rivojlantirishga ko‘maklashadi;
(12-modda birinchi qismining sakkizinchi xatboshisi O‘zbekiston Respublikasining 2021-yil 1-apreldagi O‘RQ-681-sonli Qonuni tahririda — Qonun hujjatlari ma’lumotlari milliy bazasi, 02.04.2021-y., 03/21/681/0264-son)
umumiy o‘rta va o‘rta maxsus ta’lim tashkilotlari, kasb-hunar maktablari, kasb-hunar kollejlari, texnikumlar, oliy ta’lim muassasalari bitiruvchilari bandligini ta’minlash bo‘yicha choralar ko‘radi;
eng kam ish o‘rinlari sonini belgilaydi;
mehnat bozorini barqarorlashtirishga, shu jumladan xodimlarning ommaviy ravishda ishdan ozod etilishining oldini olishga, ustuvor rivojlantirish hududlarini aniqlashga ko‘maklashadigan tadbirlarni ishlab chiqadi va amalga oshiradi.
Oldingi tahrirga qarang.
Mahalliy davlat hokimiyati organlari qonunchilikka muvofiq boshqa vakolatlarni ham amalga oshirishi mumkin.
(12-moddaning ikkinchi qismi O‘zbekiston Respublikasining 2021-yil 21-apreldagi O‘RQ-683-sonli Qonuni tahririda — Qonunchilik ma’lumotlari milliy bazasi, 21.04.2021-y., 03/21/683/0375-son)